ხელისუფლებისგან მხარდაჭერილი საპრეზიდენტო კანდიდატის, სალომე ზურაბიშვილის ქსენოფობიური განცხადება ნინოწმინდაში ეთნიკურად სომეხ მოქალაქეებთან შეხვედრისას ხელს უწყობს შუღლის გაღვივებას. ამის შესახებ ინფორმაციას 14 არასამთავრობო ორგანიზაცია ავრცელებს.

"თუმცა საარჩევნო პროგრამა არ უნდა შეიცავდეს ომისა და ძალადობის პროპაგანდას, არსებული სახელმწიფო და საზოგადოებრივი წყობილების ძალადობით შეცვლისკენ ან დამხობისკენ, საქართველოს ტერიტორიული მთლიანობის დარღვევისკენ, ეროვნული შუღლისა და მტრობისკენ, რელიგიური და ეთნიკური დაპირისპირებისკენ მოწოდებას", — წერია არასამთავრობოების განცხადებაში.

მათივე თქმით, სალომე ზურაბიშვილის მხრიდან რასისტული და ქსენოფობიური შინაარსის განცხადებები პირველი არაა.

არასამთავრობოებს თქმით, სხვადასხვა პოლიტიკური პარტიის ლიდერები და არჩევნებში მონაწილე სუბიექტები, ხშირად იყენებენ სიძულვილის ენას და მიზანმიმართულად ავრცელებენ ქსენოფობიურ განცხადებებს, მაგრამ მმართველი გუნდის მიერ მხარდაჭერილი კანდიდატისგან აღნიშნული განცხადების მოსმენა, სახიფათო და ანტისახელმწიფოებრივია.

არასამთავრობოები არჩევნებში მონაწილე ყველა კანდიდატს და პოლიტიკურ ძალას მოუწოდებენ, რომ პატივი სცენ კანონს და თავი შეიკავონ ქსენოფობიური, რასისტული და დისკრიმინაციული განცხადებებისგან.

მმართველი გუნდის მიერ მხარდაჭერილმა კანდიდატმა შეხვედრაზე განაცხადა, რომ ყოფილმა პრეზიდენტმა თურქებს მოქალაქეობა მისცათ, მაგრამ ეთნიკურად სომხებს — არა.

ხელმომწერი ორგანიზაციები:

  • ტოლერანტობის და მრავალფეროვნების ინსტიტუტი;
  • მედიის განვითარების ფონდი;
  • საქართველოს რეფორმების ასოციაცია;
  • კონსტიტუციის 42-ე მუხლი;
  • საქართველოს დემოკრატიული ინიციატივა;
  • საფარი;
  • დემოკრატიისა და უსაფრთხო განვითარების ინსტიტუტი;
  • თანასწორობის მოძრაობა;
  • პარტნიორობა ადამიანის უფლებებისთვის;
  • საქართველოს ახალგაზრდა იურისტთა ასოციაცია;
  • ეთნიკურობისა და მულტიკულტურალიზმის შესწავლის ცენტრი;
  • მედია კლუბი;
  • შავი და ბალტიის ზღვის ალიანსი — საქართველო;
  • ადამიანის უფლებათა ცენტრი;
  • ფონდი ღია საზოგადოება — საქართველო