"გამოვალ და ყველაფერს მოგახსენებთ. იმდენ რამეს გაიგებთ, რომ გაგიკვირდებათ", — ამის შესახებ დღეს, 3 ოქტომბერს სპორტის ყოფილმა მინისტრმა საქალაქო სასამართლოში ომეგა ჯგუფის საქმეზე დაკითხვაზე შესვლამდე, ჟურნალისტებს განუცხადა.

ლევან ყიფიანმა სხვა დეტალებზე არ ისაუბრა. თუმცა, მანამდე მისმა ადვოკატმა, შალვა ხაჭაპურიძემ თქვა, რომ გავრცელებული აუდიოჩანაწერი დამონტაჟებულია და შეცვლილია შინაარსი. მისივე თქმით, ჩანაწერები სხვადასხვა დროსაა გაკეთებული.

შალვა ხაჭაპურიძე, ასევე, აღნიშნავს, რომ მისი დაცვის ქვეშ მყოფს ომეგა ჯგუფის დამფუძნებელთან, ზაზა ოქუაშვილთან სამი წლის განმავლობაში ჰქონდა კონტაქტი:

"იგი მუშაობდა ოფიციალურად და ხელშეკრულება დადებულია, სადაც მითითებულია, რომ ის ვალდებული იყო ეწარმოებინა მოლაპარაკებები, როგორც ფიზიკურ, ისე სახელმწიფო და კერძო დაწესებულებებთან ამ კომპანიასთან წარმოშობილ გარკვეულ პრობლემებთან. ეს მისი მოვალეობა გახლდათ".

ადვოკატის თქმითვე, მისი დაცვის ქვეშ მყოფს ყოფილ პროკურორთან, ოთარ ფარცხალაძესთან მეგობრული ურთიერთობა ჰქონდა.

"სარდაფის ეპიზოდზე თავად გააკეთებს კომენტარს, როგორ სასამართლოში შესვლამდე, ისე სასამართლოში და მის გარეთ", — განუცხადა ჟურნალისტებს ადვოკატმა.

ომეგა ჯგუფის საქმეზე ლევან ყიფიანის დაკითხვა სასამართლოში ამ წუთებში მიმდინარეობს. საჯარო ინტერესებიდან გამომდინარე მათ გადაწყვიტეს ჩვენება სასამართლოსთვის მიეცათ. ამავე საქმის ფარგლებში პროკურატურამ გამოკითხვაზე კიდევ ერთხელ დაიბარა ომეგა ჯგუფის დამფუძნებელი ზაზა ოქუაშვილი.

10 სექტემბერს რუსთავი 2-მა გაავრცელა ჩანაწერები, რომლებშიც, სავარაუდოდ, სპორტის ყოფილი მინისტრი ლევან ყიფიანი და ომეგა ჯგუფისდამფუძნებელ ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა. ორი კვირის შემდეგ, პროკურატურამ ომეგა ჯგუფის საქმეს კიდევ რამდენიმე ჩანაწერი დაურთო.