საქართველოს სახალხო დამცველის, ნინო ლომჯარიას განცხადებით, ხორავას ქუჩის საქმის პოლიტიზირება ხდება, როგორც უმრავლესობის ისე ოპოზიციის მხრიდან.

ომბუდსმენი იხსენებს პლენარულ სხდომას, სადაც ხორავას ქუჩის საქმეზე შექმნილ საგამოძიებო კომისიის საბოლოო დასკვნას განიხილავდნენ. მისი შეფასებით, დოკუმენტის განხილვა "წმინდა პოლიტიკური დისკუსია იყო".

"ამ თემის ორივე მხრიდან პოლიტიზირება ხდება. ჩვენი პოზიცია, როცა ამაზე[ხორავას ქუჩის საქმის საგამოძიებო დასკვნა] ვსაუბრობთ არის პოლიტიკისგან დაცლილი, თუმცა სამწუხაროდ, პარლამენტშიც მოვისმინეთ ცალკეული დეპუტატებისგან პოლიტიკური შეფასებები სახალხო დამცველის მისამართით, თითქოს ჩვენ გადავაჭარბეთ ჩვენს უფლებამოსილებას", — განაცხადა ნინო ლომჯარია ტოკ-შოუ რეაქციის პირდაპირ ეთერში.

ნინო ლომჯარიას განცხადებით, პოლიტიკური პარტიები და ცალკეული პოლიტიკოსები სახალხო დამცველის ინსტიტუტიც დისკრედიტაციას შეგნებულად ცდილობენ.

26 სექტემბერს აქციაზე სახალხო დამცველის წარმომადგენლებს თავს დაესხნენ, სიტყვიერი შეურაცხყოფა მიაყენეს. აგრესიის საფუძველი იყო ის, რომ სახალხო დამცველი არასაკმარისს აკეთებს და უფრო მეტი უნდა გააკეთოს. ასეთი დამოკიდებულება არის დამაზიანებელი ყველასთვის. სახალხო დამცველის განცხადებები ამ თემაზე იქნება დაცლილი პოლიტიკისგან და მოვუწოდებ პოლიტიკოსებს ნუ ეცდებიან ამ ინსტიტუტის დისკრედიტაციას პოლიტიკური ქულების დასაწერად", — განაცხადა ნინო ლომჯარიამ.

საქართველოს სახალხო დამცველმა პარლამენტს ხორავას ქუჩის საქმეზე რეკომენდაციებით მიმართა. ომბუდსმენმა 19 სექტემბერს მოთხოვა, რომ ამ საკითხზე პარლამენტის მიერ მიღებულ დადგენილებაში სხვა საკითხებთან ერთად საგამოძიებო კომისიის ორი რეკომენდაცია შევიდეს.

ომბუდსმენის რეკომენდაციები

  • დაიწყოს გამოძიება სამოხელეო დანაშაულზე და იმ პირების მიმართ, რომლებმაც გამოძიებაზე არამართლზომიერი გავლენა მოახდინეს;
  • დაიწყოს მიხეილ კალანდიას მიმართ სისხლისსამართლებრივი დევნა მკვლელობაში მონაწილეობისთვის.

პარლამენტის მხრიდან რეკომენდაციების გაზიარების აუცილებლობაზე საუბრობენ არასამთავრობო ორგანიზაციებიც და მიიჩნევენ, რომ საგამოძიებო კომისიის დასკვნა არგუმენტირებულია.

ამავე თემაზე: