ხორავას ქუჩაზე მოკლული დავით სარალიძის მამის, ზაზა სარალიძის თქმით, ის მართლმადიდებელი ეკლესიის პატრიარქს, ილია მეორეს შეხვდება. როგორც ზაზა სარალიძემ On.ge-ს განუცხადა, შეხვედრა დღეს, 18 სექტემბერს, 19 საათზე საპატრიარქოში გაიმართება.

სარალიძის თქმითვე, ამ ეტაპზე უცნობია, თუ რა საკითხებზე ისაუბრებს ის პატრიარქთან.

ზაზა სარალიძემ პატრიარქთან შეხვედრა 16 სექტემბრის აქციაზე დააანონსა. მისი განცხადებით, შეხვედრის ინიციატივა პატრიარქს ეკუთვნის.

სარალიძე პატრიარქს რამდენიმე თვის წინ შეხვდა, შეხვედრის სურვილი სარალიძემ თავად გამოთქვა. მაშინ სარალიძემ საპატრიარქო უკომენტაროდ დატოვა.

რუსთაველის გამზირზე, პარლამენტთან ზაზა სარალიძისა და მალხაზ მაჩალიკაშვილის საპროტესტო აქციები 10 სექტემბრიდან განახლდა. სარალიძე ითხოვს მისი შვილის მკვლელისა და იმ ადამიანების დასჯას, ვინც მკვლელს ხელს აფარებდა, მალხაზ მაჩალიკაშვილის მოთხოვნა კი სპეცოპერაციის შედეგად დაღუპული შვილის საქმის გამოძიებაა.