მამა შალვა კეკელიამ, საკვირაო ქადაგებისას მრევლს განუცხადა, რომ მარიხუანის მოხმარებისა და წარმოების ლეგალურობა ცოდვის დაკანონებაა, რაც მეორედ მოსვლის მოახლოებას გულისხმობს.

"ჩვენ ვიცით ყველამ, ქრისტიანებმა, რომ მეორედ მოსვლის წინ ყველა ცოდვა შეიძენს კანონის სახეს. არ იქნება ცოდვა, რომელსაც კანონის სახე არ ექნება და ჩვენ დღეს დავდექით ამ რეალობის წინაშე. ჩვენ სახელმწიფო გვესაუბრება იმაზე, რომ მივიღოთ ის რასაც ღმერთი გმობს, ის რასაც ღმერთი კრძალავს", - განაცხადა მამა შალვამ.

კეკელიას განცხადებით, მთავრობა საუბრობს იმაზე, რომ ეკლესიურები არიან და პარალელურად "ცოდვას აკანონებენ". მან მოუწოდა მრევლს ქადაგების შემდეგ, სამების ტაძარში გადაინაცვლონ, სადაც პატრიარქის ქადაგებას მოუსმენენ. მისი თქმით, ქადაგების შემდეგ გადაწყდება როგორ მოიქცევიან და დაიწყება თუ არა საპროტესტო აქციები.

გუშინ, სასულიერო პირების ნაწილმა, თბილისის საკრებულოსთან პარაკლისი აღავლინა და შინაგან საქმეთა სამინისტროს მიერ კანაფის კონტროლის შესახებ კანონპროექტი კიდევ ერთხელ გააკრიტიკა.

პარაკლისის დასრულების შემდეგ, მრევლს მამა შალვა კეკელიამ მიმართა. მისი თქმით, ეკლესია ორ გადაწყვეტილებას აპროტესტებს: პირველი საკონსტიტუციო სასამართლოს მიერ მარიხუანის მოხმარების ლეგალიზებას ეხება, ხოლო მეორე კანაფის სამედიცინო მიზნებით კულტივაციასა და ექსპორტს.

მან საკრებულოს წინ სასულიერო პირების მიერ შემუშავებული "ორი გამოსავალი" წაიკითხა.

  • კონსტიტუციის შესაბამის მუხლში შევიდეს ისეთი ცვლილება, რომ თვითგანვითარება არ გულისხმობდეს თვითდაზიანების ქმედებას.
  • არ მოხდეს კანონის იმ ნაწილის მიღება, სადაც მარიხუანას ლეგალურ კულტივაციაზეა საუბარი.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.

ამავე თემაზე: