ხორავას ქუჩაში მოკლულის მამა, ზაზა სარალიძე ექიმის რეკომენდაციით შიმშილობას წყვეტს. მას ჯანმრთელობის პრობლემები აქვს და შიმშილობა მის სიცოცხლეს კიდევ უფრო მეტი რისკის ქვეშ აყენებს.

ზაზა სარალიძემ ინგოროყვას კლინიკა დაახლოებით ნახევარი საათის წინ დატოვა და პარლამენტთან მიმდინარე აქციას შეუერთდა. მისი თქმით, ის პროტესტს აგრძელებს.

ხორავას ქუჩაზე მოკლულის მამა, ზაზა სარალიძე პარლამენტთან მიმდინარე საპროტესტო აქციაზე შეუძლოდ გახდა. სასწრაფო სამედიცინო დახმარების ჯგუფმა ის ინგოროყვას კლინიკაში გადაიყვანა. ზაზა სარალიძეს დიაბეტი აქვს, რის გამოც განსაკუთრებით მისთვის შიმშილობა კატეგორიულად აკრძალულია. ექიმის ცნობით ამჟამად ის თავს კარგად გრძნობს.

ზაზა სარალიძე და მალხაზ მაჩალიკაშვილი საქართველოს პარლამენტთან მეექვსე დღეა შიმშილობენ. ზაზა სარალიძე ითხოვს მისი შვილის მკვლელისა და იმ ადამიანების დასჯას, ვინც მკვლელს ხელს აფარებდა, მალხაზ მაჩალიკაშვილი კი სპეცოპერაციის შედეგად დაღუპული შვილის საქმის გამოძიებას ითხოვს. მისი თქმით, თემირლან მაჩალიკაშვილი არ იყო დაკავშირებული ტერორისტებთან და სახელმწიფოს მხრიდან ადგილი ჰქონდა გადაცდომას.

ზაზა სარალიძემ აქციები 10 სექტემბერს მას შემდეგ, განაახლა, რაც პარლამენტში შექმნილმა საგამოძიებო კომისიამ ანგარიში გამოაქვეყნა.