საპატრიარქოს მდივანმა, მიქაელ ბოტკოველმა განაცხადა, რომ მარიხუანის სამედიცინო მიზნით წარმოების საკითხზე საპატრიარქო ხვალ იმსჯელებს. როგორც ბოტკოველმა On.ge-ს განუცხადა საპატრიარქოს აქამდეც ჰქონდა ჩანიშნული კონფერენცია მარიხუანას დეკრიმინალიზაციის საკითხზე და ამ თემასაც განიხილავენ.

"მოგვისწრო ზუსტად ამ ახალმა ინფორმაციამ. რა თქმა უნდა, ჩვენი განრიგი შესაძლოა სულ შეიცვალოს და პირდაპირ ამ თემით დავიწყოთ საუბარი", - განაცხადა ბოტკოველმა.

ბოტკოველმა დამატებით კითხვებს აღარ უპასუხა, მან მატყუარა უწოდა On.ge-ს ჟურნალისტს და აღნიშნა, რომ On.ge-ს უკვე ჰქონდა ინფორმაცია საპატრიარქოს პოზიციის შესახებ. პატრიარქის მდივანმა მოუწოდა On.ge-ს სხვა მედიისთვის მიცემული კომენტარი გამოგვეყენებინა. ბოტკოველის თქმით, საქართველოში ბევრი მედიაა და თავად ერთია ამიტომ ყველას კითხვაზე პასუხის გაცემას ვერ შეძლებს.

საპატრიარქოს კონფერენცია ხვალ, 12 სექტემბერს, 10 საათზე წმინდა ანდრია პირველწოდებულის სახელობის ქართულ უნივერსიტეტში გაიმართება.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანასგან წარმოებული მედიკამენტების ექსპორტზე გატანას გულისხმობს. ჯანდაცვის კომიტეტის თავმჯდომარე აკაკი ზოიძე ამბობს, რომ ინიციატივა მარიხუანას მოხმარების შემზღუდველ კანონპროექტთან ერთად მთავრობის სხდომაზე იქნება წარდგენილი.