პარლამენტის ფრაქცია ქართული ოცნების თავმჯდომარე გიორგი ვოლსკი მიიჩნევს, რომ ქორწინების განსაზღვრის შესახებ რეფერენდუმის ჩატარება ქვეყანაში არავითარ დაძაბულობას არ მოიტანდა.

იგი არ ეთანხმება პრეზიდენტ გიორგი მარგველაშვილის არგუმენტს, რომ აღნიშნული საკითხი კანონმდებლობაში ისედაც ჩაწერილია და კიდევ ერთხელ დაზუსტებას არ საჭიროებს. ვოლსკი აცხადებს რომ პრეზიდენტის გადაწყვეტილება აბსოლუტურად უსაფუძვლოა:

"საკითხი ინიცირებულია, ყველა რეგიონში ვიყავით, უამრავი შეხვედრა ჩავატარეთ, ფართო მასშტაბის, შევიწროებული მასშტაბის, კომიტეტებზე განვიხილეთ, ბევრი თემა დავაზუსტეთ თუ როგორ ხდება და რა გამოცდილებაა ევროკავშირში. მე ვფიქრობ რეფერენდუმი რომ ყოფილიყო ამაში ცუდი არაფერი არ არის, რადგან გუნდს, სახელმწიფო მმართველს გააჩნია საკმაოდ სწორი და ჩამოყალიბებული პოზიცია. ვფიქრობ არასწორს ამბობს რომ ისედაც არის ეს კანონში, ანუ გვიპირისპირდება თვითონ".

გიორგი მარგველაშვილმა რეფერენდუმის ჩატარებასთან დაკავშირებით გადაწყვეტილება 9 აგვისტოს მიიღო. მან განაცხადა, რომ ეს საკითხი კონსტიტუციაში ისედაც გადაწყვეტილია. ამასთან, კონსტიტუციაში ქორწინების საკითხზე ჩასწორების ინიციატორები პრეზიდენტის გადაყენების მოთხოვნით აქციების ჩატარებას გეგმავენ.

"გინდათ თუ არა, რომ ერთნაირ სქესიანთა ქორწინება დაშვებულ იქნას საქართველოში?" - ასეთი ფორმულირება ჰქონდა სარეფერენდუმო კითხვას, რომელიც საინიციატივო ჯგუფმა პრეზიდენტს განსახილველად წარუდგინა.