კონსტიტუციაში ქორწინების საკითხზე ჩასწორების ინიციატორები პრეზიდენტის გადაყენების მოთხოვნით აქციების ჩატარებას გეგმავენ. ინფორმაციას რუსთავი 2 ავრცელებს.

გიორგი მარგველაშვილმა რეფერენდუმის დანიშვნასთან დაკავშირებით უარყოფითი გადაწყვეტილება მიიღო, რის გამოც ინიციატორთა ჯგუფი მას ქვეყნის ლეგიტიმურ პრეზიდენტად აღარ მიიჩნევენ.

ჯგუფი სამოქმედო გეგმას დღეს საღამოს წარადგენს. პარტია თამაზ მეჭიაური - ერთიანი საქართველოსათვის წევრი ნოდარ ბრეგაძე აცხადებს, რომ ისინი პრეზიდენტის გადასაყენებლად მიმართავენ როგორც სამართლებრივ გზას, ასევე მძლავრ საპროტესტო აქციებს:

"ის აღარ არის საქართველოს ლეგიტიმური პრეზიდენტი, რადგან სულში ჩააფურთხა ნახევარ მილიონ ამომრჩეველს. მან გადადგა ნაბიჯი, რომელიც საქართველოს მოსახლეობის ინტერესების საწინააღმდეგოდაა მიმართული".

გიორგი მარგველაშვილმა რეფერენდუმის ჩატარებასთან დაკავშირებით გადაწყვეტილება გუშინ მიიღო. მან განაცხადა, რომ ეს საკითხი კონსტიტუციაში ისედაც გადაწყვეტილია.