"მე მიმაჩნია, რომ ძალიანაც მებრძოლი ქალბატონია, მას არასდროს უკან არ დაუხევია ყველაზე უფრო მწვავე პრობლემების წინაშეც. ის, რა თქმა უნდა, იქნება ღირსეული პრეზიდენტი", - ასე შეაფასა უმრავლესობაში შემავალი ფრაქციის, კონსერვატორების წევრმა, ზვიად ძიძიგურმა სალომე ზურაბიშვილის საპრეზიდენტო კანდიდატურა.

ძიძიგურის თქმით, კონსერვატორების ფრაქციას სურს მხარი დაუჭიროს ზურაბიშვილის საპრეზიდენტო არჩევნებზე. მისივე თქმით, ზურაბიშვილის მხარდაჭერა სერიოზულად განიხილება და მალე გახდება ცნობილი დაუჭერს თუ არა მას მხარს ქართული ოცნება:

"ჩვენი ფრაქცია - კონსერვატორები, რომელიც არის პარტნიორი პარტია ქართული ოცნების, სიამოვნებით დავუჭერდით მხარს ქალბატონ სალომე ზურაბიშვილს...

სალომე ზურაბიშვილი გახლავთ ჩვენი გაერთიანებული ოპოზიციის თანამებრძოლი 2007-2008 წლებში. ჩვენ ძალიან აქტიურად ვიყავით დაპირისპირებული მიხეილ სააკაშვილის რეჟიმთან და იყო მეტსაც გეტყვით, რომ ის ჩვენი პრემიერ-მინისტრობის კანდიდატი იმ ბრძოლაში",- განაცხადა ძიძიგურმა.

გავრცელებული ინფორმაციით, ქართულმა ოცნებამ არჩევნებში მხარი შესაძლოა დამოუკიდებელ კანდიდატს სალომე ზურაბიშვილს დაუჭიროს, თუმცა მამუკა ბახტაძემ განაცხადა, რომ გუნდში არსებობს პოზიცია საპრეზიდენტო კანდიდატის აუცილებლად დაყენებასთან დაკავშირებით.

თბილისის მერმა, კახა კალაძემ განმარტა, რომ დაახლოებით 10 სექტემბრისთვის გაასაჯარივებენ იმ საპრეზიდენტო კანდიდატის ვინაობას, ვისაც მმართველი პარტია ქართული ოცნება მხარს დაუჭერს. კალაძე ამბობს, რომ მათ მიერ მხარდაჭერილი პირი აუცილებლად უპარტიო იქნება.

ქართული ოცნების პოლიტსაბჭოს თავმჯდომარემ, ბიძინა ივანიშვილმა კი განაცხადა, რომ ჯერ არ გადაუწყვეტიათ ვის დაუჭერს მხარს ოცნება საპრეზიდენტო არჩევნებზე.