გორში ავტოსაგზაო შემთხვევას ერთი ადამიანი ემსხვერპლა, ოთხი პირი კი დაშავდა. ინფორმაციას On.ge-ს შინაგან საქმეთა სამინისტრო უდასტურებს.

პირველადი მონაცემებით, მძღოლმა საჭე ვერ დაიმორჩილა და გზაზე ამობრუნდა. შსს-ს ინფორმაციით, გარდაცვლილი პირი მანქანის მგზავრი იყო. დაშავებულები სასწრაფო სამედიცინო დახმარების ჯგუფებმა სამედიცინო ცენტრ გორმედში გადაიყვანეს. როგორც სამედიცინო ცენტრში On.ge-ს განუცხადეს, ერთ-ერთი დაშავებული ახალგაზრდაა, რომელსაც ტვინის შერყევის დიაგნოზი დაუდგინდა და მისივე მოთხოვნით სახლში გაიწერა. დაშავებულებს მნიშვნელოვანი დაზიანებები არ აღენიშნებოდათ.

საქმეზე გამოძიება საქართველოს სისხლის სამართლის კოდექსის 276-ე მუხლის მეხუთე ნაწილითაა დაწყებული. აღნიშნული მუხლით ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც ადამიანის სიცოცხლის მოსპობა გამოიწვია, ისჯება თავისუფლების აღკვეთით ვადით ოთხიდან შვიდ წლამდე.