შინაგან საქმეთა სამინისტრომ ბინისა და ავტომობილების ქურდობის ბრალდებით ერთი პირი დააკავა. ბრალდებულს ოთხიდან შვიდ წლამდე პატიმრობა ემუქრება.

უწყების ინფორმაციით, ბრალდებულემა 20 აგვისტოს ახალციხეში ერთ-ერთ ბინაში შევიდა, ფული, მობილური ტელეფონი, ძვირადღირებული პარფიუმერია მოიპარა და მიიმალა. 25 აგვისტოს, ასევე, ახალციხეში ავტომობილიდან ფული მოიპარა, ხოლო 28 აგვისტოს ქუჩაში გაჩერებული ერთ-ერთი ავტომობილიდან სანადირო თოფს მართლსაწინააღმდეგოდ დაეუფლა.

როგორც შინაგან საქმეთა სამინისტრო განმარტავს, ნაქურდალი სანადირო თოფი დაკავებულის საცხოვრებელი სახლის ჩხრეკისას ნივთმტკიცების სახით იქნა ამოღებული.

უწყების განცხადებით, დაკავებისას ბრალდებულმა პოლიციას წინააღმდეგობა გაუწია და სანადირო თოფიდან ჰაერში რამდენიმე გასროლა განახორციელა.

ახალციხის რაიონულმა სასამართლომ დაკავებულს აღმკვეთი ღონისძიების სახით ორთვიანი წინასწარი პატიმრობა შეუფარდა. გამოძიება საქართველოს სსკ-ს 177-ე მუხლის მე-2 ნაწილის "ა" და მე-3 ნაწილის "გ" ქვეპუნქტებით ქურდობის ფაქტზე მიმდინარეობს, რამაც მნიშვნელოვანი ზიანი გამოიწვია.