ლონდონის თავზე "პატარა ტრამპის" გიგანტური ბუშტის გაშვების შემდეგ ყვითელბიკინიანი ლონდონის მერის, სადიქ ხანის ბუშტსაც გაუშვებენ. BBC-ის ცნობით, აქციის მონაწილეებმა მერიისგან უკვე მიიღეს თანხმობა და ის პარლამენტის მოედნის თავზე პირველ სექტემბერს იფრენს.

კამპანიის ორგანიზატორებმა 58 182 ფუნტი სტერლინგი შეაგროვეს "პატარა ხანის" ბუშტისთვის, რომლის სიგრძე თითქმის ცხრა მეტრია.

მერის საწინააღმდეგო კამპანიისთვის ფულის შეგროვება მას შემდეგ დაიწყო, რაც ივლისის თვეში, აშშ-ს პრეზიდენტის ვიზიტისას, "პატარა ტრამპის" გიგანტური ბუშტი გაუშვეს ლონდონის თავზე.

ლონდონის მერის თქმით, თუკი შაბათ დღეს ხალხს მისი ყვითელ ბიკინში ხილვა სურს, ამას მხოლოდ მიესალმება:

"თუმცა, არ ვფიქრობ, რომ ყვითელი ჩემი ფერია".

აქციის ორგანიზატორი, იანი ბრუერი, სადიქ ხანს ადანაშაულებს, რომ ის თითქმის არაფერს აკეთებს ქალაქში კრიმინალის აღმოსაფხვრელად:

"ლონდონში ხალხი თავს უსაფრთხოდ ვერ გრძნობს და არც არიან უსაფრთხოდ".

13 ივლისს დონალ ტრამპის გამოსახულებიანი ექვსმეტრიანი ბუშტი პარლამენტის შენობის წინ ორი საათის განმავლობაში დაფრინავდა. ბუშტზე ტრამპი გაბრაზებული სახით იყო გამოსახული, ბავშვის საფენი ეცვა და მარჯვენა ხელში მობილური ტელეფონი ეჭირა.

როგორც ერთ-ერთმა ორგანიზატორმა CNN-ს უთხრა, გიგანტური ბუშტი შეიქმნა იმისთვის, რომ ტრამპთან ელაპარაკათ იმ ენაზე, რომელიც მას ესმის. ლონდონის მოსახლეობა ბრიტანეთში დონალდ ტრამპის ვიზიტს აპროტესტებს. პარლამენტის შეკრებილი ადამიანები ამბობენ, რომ ტრამპი სასურველი სტუმარი არ არის.