სახალხო დამცველი ნინო ლომჯარია ეროვნული ნაკრების ვიცე-კაპიტანს, გურამ კაშიას მხარდაჭერას უცხადებს. ომბუდსმენი კაშიას უეფას მიერ დაწესებული #EqualGame-ის ჯილდოს გადაცემის ფაქტს ეხმიანება და მას თანასწორობისთვის ბრძოლაში შეტანილი წვლილის საერთაშორისო აღიარებას ულოცავს.

ომბუდსმენის განცხადებით, გურამ კაშიას ქმედებამ ნათლად წარმოაჩინა, თუ რა მნიშვნელოვანი წვლილი შეიძლება შეიტანოს ერთმა სიმბოლურმა ჟესტმა ჩაგრული ადამიანების მხარდაჭერის და თანასწორობის იდეის პოპულარიზაციაში. მისივე თქვით, სწორედ ამიტომაა ეროვნული ნაკრების წევრობა დიდ პატივთან ერთად, დიდი პასუხისმგებლობაც.

#გურამშენთანვართ ამ ჰეშთეგით ქართულ ინტერნეტსივრცეში საქართველოს ნაკრების ფეხბურთელის, გურამ კაშიას მხარდასაჭერი კამპანია მიმდინარეობს. მას შემდეგ, რაც კაშია ლგბტ სამკლაურის გაკეთებისა და UEFA-ს თანასწორობის ჯილდოს გამო ონლაინ ბულინგის მსხვერპლი გახდა, მან ფეისბუქი გააუქმა და ინსტაგრამის ანგარიში დახურა. ქართული ინტერნეტი კი მის მხარდასაჭერად გაერთიანდა.

კაშიას მხარდაჭერას უცხადებენ ფეხბურთელები, ჟურნალისტები, პოლიტიკური და საზოგადო მოღვაწეები და არასამთავრობო ორგანიზაციები.

კაშიამ მხარდამჭერებს უპასუხა. ინსტაგრამის სთორიში მან დაპოსტა, რომ თითოეულ შეტყობინებას კითხულობს და ამაყობს.