სექტემბერში რუსეთის თავდაცვის სამინისტრო 1981 წლის შემდეგ ყველაზე მასშტაბურ სამხედრო წვრთნას გამართავს. BBC-ის ცნობით, მანევრებში 300 ათასი სამხედრო მიიღებს მონაწილეობას.

რუსეთის ცენტრალურ და აღმოსავლეთ ნაწილებში წვრთნებში ჩაერთვებიან ჩინეთი და მონღოლეთი.

კრემლის პრესსპიკერის დმიტრი პესკოვის თქმით, წვრთნები მათი ქვეყნის მიმართ "არამეგობრული და აგრესიული" დამოკიდებულებების გამო ტარდება.

სწავლება "აღმოსავლეთი - 2018" 11 სექტემბრიდან 15 სექტემბრამდე გაგრძელდება და თითქმის ყველა პოლიგონს მოიცავს. სწავლებაში ჩართავენ 36 ათას ჯავშანმანქანას, ათასამდე თვითმფრინავსა და ვერტმფრენს.

რუსული შეიარაღებული ძალების შემადგენლობაში დაახლოებით ერთი მილიონი სამხედრო მოსამსახურეა. ამასთან, წვრთნებში ერთვება, თითქმის მათი მესამედი.

გასული წლის სექტემბერში, ბელორუსმა და რუსეთმა განახორციელეს წვრთნები "დასავლეთი - 2017", რაშიც 13 ათასზე ნაკლები სამხედრო მოსამსახურე მონაწილეობდა.

ნატოს პრესსპიკერმა, დილან ვაიტმა განაცხადა, რომ ნატო მონიტორინგს გაუწევს დაგეგმილ წვრთნებს:

"ყველა ქვეყანას აქვს უფლება გაწვრთნას საკუთარი შეიარაღებული ძალები, მაგრამ უაღრესად მნიშვნელოვანია, ეს გაკეთდეს გამჭვირვალედ".

რუსეთსა და ნატოს შორის დაძაბულობამ 2014 წელს, უკრაინაში, ყირიმის ანექსიისა და აღმოსავლეთ უკრაინაში, რუსეთის მიერ პრო-რუსი მეამბოხეების მხარდაჭერის შემდეგ მოიმატა.