საქართველოს მართლმადიდებლური ეკლესიის კათოლიკოს-პატრიარქმა ილია მეორემ სოფლის მეურნეობის მინისტრი, ოთარ დანელია დალოცა, ჯვარი უსახსოვრა და წარმატებები უსურვა. ინფორმაციას ამის შესახებ სოფლის მეურნეობის სამინისტრო ავრცელებს.

ფოტო: სოფლის მეურნეობის სამინისტრო

დღეს, სოფლის მეურნეობის მინისტრი ოთარ დანელია, ადგილობრივი ხელისუფლების წარმომადგენლებთან და საქართველოს მართლმადიდებლური ეკლესიის კათოლიკო-პატრიარქ ილია ΙΙ-სთან ერთად, ონის რაიონის სოფელ შარდომეთში მდებარე ქართულ-შვეიცარიული კომპანიის "ბლუნშტეინ საქართველოს" მესაქონლეობის ფერმაში იმყოფებოდა.

საქართველოს სოფლის მეურნეობის მინისტრმა, ოთარ დანელიამ და კომპანიის ხელმძღვანელმა ირაკლი კერვალიშვილმა საქართველოს პატრიარქს რეგიონში მესაქონლეობის თანამდროვე ფერმების მნიშვნელობაზე მიაწოდეს ინფორმაცია.

მართლმადიდებლური ეკლესიის კათოლიკოს-პატრიარქმა ილია ΙΙ-მ ადგილობრივი მოსახლეობა დალოცა, გაწეული საქმიანობისთვის სოფლის მეურნეობის მინისტრსა და ქართულ-შვეიცარიული კომპანიის ხელმძღვანელს ჯვრები უსახსოვრა და წარმატებები უსურვა.

ილია მეორემ რამდენიმე დღის წინ ასევე საჯაროდ დალოცა პრემიერმინისტრი გიორგი კვირიკაშვილი. პატრიარქის თქმით, კვირიკაშვილი "ხალხს უყვარს".

ეროვნულ დემოკრატიული ინსტიტუტის (NDI) მიერ წინასაარჩევნო პერიოდში მოსახლეობის განწყობების შესასწავლად ჩატარებული კვლევის მიხედვით, გადაწყვეტილი ამომრჩევლის 35 პროცენტი აცხადებს, რომ შემდეგ საპარლამენტო არჩევნებზე მათ პოლიტიკურ გადაწყვეტილებაზე მნიშვნელოვან გავლენას მოახდენს მრევლისა და მღვდლის პოლიტიკური შეხედულებები. NDI-ის კვლევა 29 ივლისს გამოქვეყნდა.