პანამის დოკუმენტებით ირკვევა, რომ რუსეთის ფედერაციის პრეზიდენტის, ვლადიმერ პუტინის უახლოესი წრე ოფშორულ ზონებში 2 მილიარდი აშშ დოლარის ღირებულების კონტრაქტებს ფლობს.

თავად პუტინის გვარი დოკუმენტებში არ ფიგურირებს, თუმცა მისი მეგობრები და გარემოცვის წევრები სხვადასხვა საქმიანობის შედეგად უდიდესი ქონების პატრონები გახდნენ. მსგავსი ოპერაციები კი პუტინის პატრონაჟის გარეშე დღევანდელ რუსეთში შეუძლებელია.

დოკუმენტების მიხედვით, მეგობრების დაგროვებული ქონებით მისი ოჯახის წევრები სარგებლობდნენ.

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.