საქართველოს საგარეო საქმეთა მინისტრმა, დავით ზალკალიანმა ჟურნალისტებთან საუბრისას განაცხადა, რომ კიდევ ერთხელ დადასტურდა საქართველოს ევროპული და ევროატლანტიკური ინტგრაციისადმი გერმანიის ურყევი მხარდაჭერა.

"გერმანია არის ჩვენი ევროატლანტიკური პროცესის სერიოზული მხარდამჭერი. რომ არ ყოფილიყო გერმანიის მხარდაჭერა, არ გვექნებოდა მკაფიო ჩანაწერი, რომ საქართველო აუცილებლად გახდება ნატო-ს წევრი. რომ არ ყოფილიყო გერმანიის მხარდაჭერა, არ გვექნებოდა ბრიუსელის სამიტის გადაწყვეტილება სახელმწიფო მეთაურების დონეზე და ის მართლაც ყოვლისმომცველი დოკუმენტი, რომელიც უპრეცედენტოა ყველა მიმართულებით, მათ შორის, ინტეგრაციულ პროცესებზე", - განაცხადა ზალკალიანმა.

მისივე თქმით, გერმანიის კანცლერს მერკელს მკაფიო გზავნილი ჰქონდა ოკუპირებულ ტერიტორიებთან დაკავშირებითაც. საგარეო საქმეთა მინისტრმა ხაზი გაუსვა საოკუპაციო ხაზთან გერმანიის კანცლერის ხვალინდელი ვიზიტის მნიშვნელობას. მისი თქმით, ეს არის მკაფიო გზავნილი, რომ გერმანია არ შეეგუება საქართველოს ოკუპაციას და ტერიტორიული მთლიანობის დარღვევას.

ექსპერტების ნაწილი აცხადებს, რომ გერმანიის კანცლერს არ ჰქონია მკაფიო გზავნილები ნატოში ინტეგრაციასა და რუსულ ოკუპაციასთან დაკავშირებით.

ანგელა მერკელი საქართველოს დღეს, 23 აგვისტოს ეწვია. მან ოფიციალური შეხვედრა გამართა პრემიერ მინისტრთან და საქართველოს პრეზიდენტთან. საქართველოს მთავრობის ადმინისტრაციაში გამართულ პრესკონფერენციაზე მერკელმა განაცხადა, რომ მხარს უჭერს საქართველოს ტერიტორიულ მთალიანობას და რუსეთის პოლიტიკა საქართველოს მიმართ უსამართლობაა.

ხვალ, 24 აგვისტოს ის საოკუპაციო ხაზთან ევროკავშირის დელეგაციას შეხვდება. მერკელი საოკუპაციო ხაზთან საქართველოს მთავრობის წარმომადგენლების გარეშე მივა და შეხვედრა მედიისთვის დახურული იქნება.

გერმანიის კანცლერის ვიზიტის სრული განრიგი იხილეთ აქ.