ლატვიასა და ესტონეთს სურთ, რომ რუსეთმა საბჭოთა ოკუპაციის დროს მიყენებული ზიანი აუნაზღაუროს. როგორც რადიო თავისუფლების რუსული ბიურო წერს, ამის შესახებ ორივე ქვეყნის იუსტიციის მინისტრებმა განაცხადეს.

საერთო განცხადებაში მინისტრებმა სავარაუდო მოქმედების გეგმა განიხილეს, მათ შორის, გაეროს დონეზე. ორივე ქვეყნის ხელისუფლება ოკუპაციად მოიხსენიებს 1940-1990 წლებს, როდესაც ბალტიისპირეთის ქვეყნები საბჭოთა კავშირის შემადგენლობაში იყვნენ.

2015 წლის დეკემბერში ლიეტუვის, ლატვიისა და ესტონეთის იუსტიციის მინისტრებმა ხელი მოაწერეს დეკლარაციას, რომლის მიხედვითაც ოკუპაციის ზარალის ანაღაურების მოთხოვნას აპირებდნენ. თუმცა მაშინ ესტონეთის საგარეო საქმეთა სამინისტრომ განაცხადა, რომ მოსკოვისგან ზიანის ანაზღაურებას არ მოითხოვენ. ლიეტუვაში კი ზარალი 185 მილიარდ ევროდ შეაფასეს.

კრემლის პრესმდივანმა, დიმიტრი პესკოვმა განაცხადა, რომ რუსეთი "ოკუპაციის" ტერმინს არ ეთანხმება იმ პერიოდთან მიმართებით, როდესაც ბალტიის ქვეყნები საბჭოთა კავშირის შემადგენლობაში იყვნენ. მან, ასევე, მოუწოდა, რომ არ დავიწყებოდათ სსრკ-ს შეტანილი წვლილი ეკონომიკასა და ინფრასტრუქტურაში.