სიბნელეში ჩავარდნა კოშმარებთან და სიზმრებთან კავშირშია, თუმცა მუზეუმში მისული დამთვალიერებლისთვის ის რეალობად იქცა, როცა პირდაპირ ხელოვნების ინსტალაციაში ჩავარდა.

პორტუგალიის მუზეუმში მდებარე ხვრელი მთლიანად მაქსიმალურად მუქ შავად არის მოხატული და ისეთ შთაბეჭდილებას ტოვებს, თითქოს უბრალოდ ზედაპირზე დახატული წრეა. მისი სიღრმე 2,5 მეტრია.

ინსტალაციას Descent into Limbo ჰქვია და 1992 წლით თარიღდება. ის ახლოდან უსასრულო მორევის ილუზიას ქმნის და არაკომფორტულ განცდას ტოვებს.

ადგილობრივი გაზეთის ცნობით, ინსტალაციის გარშემო უამრავი გამაფრთხილებელი წარწერაა, თუმცა, როგორც აღმოჩდა მუზეუმის სტუმარმა ის ვერ შენიშნა, იფიქრა, რომ უბრალოდ შავ წრეს ზემოდან გადაუვლიდა და... ჰოპ. შემთხვევის შემდეგ, გამოფენა დაიხურა და რამდენიმე დღეში თავიდან გაიხსნება.

როგორც ცნობილია, დაზარალებულმა დაზიანებები ზურგზე მიიღო, თუმცა ის საავადმყოფოდან სახლში უკვე გაწერეს.