აშშ-ის პრეზიდენტის, დონალდ ტრამპის ყოფილმა ადვოკატმა, მაიკლ კოენმა სასამართლოში ფინანსური თაღლითობა აღიარა. მანამდე, კოენმა საპროცესო შეთანხმება გააფორმა, ჩაბარდა გამოძიების ფედერალურ ბიუროს, რის შემდეგაც მან ნიუ-იორკის სასამართლოში რამდენიმე ბრალდების რვა ეპიზოდი აღიარა. ერთ-ერთი ეპიზოდი, პოლიტიკური კამპანიის დაფინანსებას ეხება.

როგორც BBC წერს, კოენმა აღიარა, რომ თავისი კლიენტის, დონალ ტრამპის მითითებით ორ ქალს, რომლებთანაც წლების წინ სექსუალური კავშირი ჰქონდა, დუმილისთვის ფული გადაუხადა. ამის შესახებ ტვიტერზე ბრალდებულის ადვოკატმა, ლენი დევისმა დაწერა:

"დღეს კოენი ადგა და ფიცის ქვეშ დაადასტურა, რომ დონალდ ტრამპმა მას დანაშაული ჩაადენინა და არჩევნებზე გავლენის მიზნით ორ ქალს ფული გადაუხადა. თუ ეს მაიკლ კოენისთვის იყო დანაშაული, რატომ არ შეიძლება, რომ ეს იყოს დანაშაული დონალდ ტრამპისთვისაც?".

კოენმა აღიარა, რომ "ფედერალურ პოსტზე კანდიდატის" მითითებით მალავდა ინფორმაციას, რომელიც მის კლიენტს ზიანს მიაყენებდა. სასამართლოზე კოენმა ტრამპის გვარი არ ახსენა, მაგრამ როგორც CNN წერს, სასამართლოს დოკუმენტებში ის აღნიშნულია, როგორც "მოქალაქე ნომერი ".

Associated Press-ის ინფორმაციით, კოენის საქმეზე განაჩენი 12 დეკემბერს გამოცხადდება. იმის გამო, რომ კოენმა საპროცესო შეთანხმება გააფორმა, მას ოთხიდან ხუთ წლამდე პატიმრობა ემუქრება.

ამერიკული მედიის ინფორმაციით, მაიკლ კოენმა პორნოვარსკვლავ სტორმი დენიელს დუმილისთვის $130 ათასი გადაუხადა. ასევე, Playboy-ის ყოფილი მოდელისთვის, კარენ მაკდუგალისთვის ფულის გადასახდელად $150 ათასი გადარიცხა.

ეს მოხდა მას შემდეგ, რაც ამ ქალებმა 2016 წლის აშშ-ის საპრეზიდენტო კამპანიის დროს განაცხადეს, რომ დონალდ ტრამპთან სექსუალური კავშირის შესახებ მოჰყვებოდნენ. სასამართლო დოკუმენტებში არც ერთი ქალის გვარი ნახსენები არაა.

კოენის წინააღმდეგ სისიხლის სამართლის საქმე 2018 წლის გაზაფხულზე აღიძრა. ივნისში ცნობილი გახდა, რომ ის ტრამპის ადვოკატი აღარაა.

ამავე თემაზე: