სახალხო დამცველი ნინო ლომჯარია მიიჩნევს, რომ ამირან დევნოზაშვილის საქმეზე, რომელსაც შვილები სახლში ჰყავდა გამოკეტილი, სახელმწიფოს ნაბიჯები უნდა გადაედგა.

ომბუდსმენი აცხადებს, რომ მამა შვილების საუკეთესო ინტერესებს უგულებელყოფდა:

"ისინი წლების განმავლობაში იყვნენ და დღესაც არიან მოწყვეტილები გარემოს, არ იღებენ საშუალო განათლებას. ფსიქოლოგებმა და სოციალურმა მუშაკებმა უნდა იმუშავონ ოჯახთან, უნდა იმუშავონ ბავშვებთან, რომ მოხდეს მათი ძალიან ფრთხილი ადაპტირება საზოგადოებრივ ცხოვრებაში".

მამა, რომელსაც სვანეთში 8 შვილი სახლში ჰყავდა გამოკეტილი, დაახლოებით ერთი კვირის წინ სისხლის სამართლის კოდექსის 150-ე, იძულების მუხლით დააკავეს.

ამირან დევნოზაშვილისა და მისი ოჯახის ისტორია 2018 წლის 27 იანვარს, რუსთავი 2-ზე გასული სიუჟეტით გახდა ცნობილი. დევნოზაშვილის უმცროსი შვილი 10 წლამდე ასაკისაა. მათგან ყველაზე უფროსი გოგო კი 21 წლის. მათ არც სკოლაში და არც საბავშვო ბაღში არასდროს უვლიათ. მამას მიაჩნია, რომ საზოგადოებისგან მხოლოდ ცუდს ისწავლიან.