ნაციონალური მოძრაობის წევრი და ეროვნული ბანკის ყოფილი პრეზიდენტი, რომან გოცირიძე მიიჩნევს, რომ საქართველოში ლარი უცხოურ ვალუტასთან მიმართებით ეროვნული ბანკისა და მთავრობის არასწორი საფინანსო და მონეტარული პოლიტიკის გამო უფასურდება. ამის შესახებ გოცირიძე ტელეკომპანია რუსთავი 2-ს ესაუბრა.

მას მიაჩნია, რომ ხელისუფლება არასწორ პოლიტიკას ატარებს და არ აქვს უნარი დაიცვას მოქალაქეები ფულის გაუფასურებისგან.

"როდესაც ქვეყანაში არის ტურისტების მოზღვავება, როდესაც იზრდება ექსპორტი, როდესაც ჩვენი თანამემამულეები დიდძალ ფულს რიცხავენ უცხოეთიდან და ამ მომენტში ლარი ეცემა, ეს იმას ნიშნავს, რომ ამაში დამნაშავე არის პირდაპირ მთავრობა და ეროვნული ბანკი. როდესაც ერთი და იგივე მოვლენა მეორდება წლების განმავლობაში, ასე იყო შარშანაც, ასე იყო შარშანწინაც და ყოველ წელიწადს აბრალებენ რაღაც. ხან უცხოურ კრიზისებს, ხან თურქეთს აბრალებენ. რატომ არ მოქმედებს თურქეთის კრიზისი სომხეთზე? ან რატომ არ მოქმედებს აზერბაიჯანზე", - განაცხადა გოცირიძემ.

ბოლო რამდენიმე დღეში ლარი დოლართან 2-ჯერ გაუფასურდა, ჯამში დაახლოებით 10 თეთრით. ლარის გაუფასურება დროში ემთხვევა ლირას კურსის ვარდნას უცხოურ ვალუტებთან. ეროვნული ბანკის მონაცემებით, 10 აგვისტოს, ლირა 50 ვალუტას შორის ერთადერთი იყო, რომელთან მიმართებითაც ლარი არ გაუფასურდა.

ამავე თემაზე: