"თურქეთის პარლამენტის სამომავლო გეგმებში სიკვდილით დასჯის აღდგენა არ შედის", - ამის შესახებ თურქეთის პარლამენტში მმართველი პარტიის წარმომადგენელმა სენა ნურ ჩელიკმა EUobserver-ს განუცხადა:

"ეს არც ჩვენს და არც პარლამენტის გეგმებში არ შედის".

დეპუტატი თურქეთის საპარლამენტო დელეგაციასთან ერთად ბრიუსელში, საგარეო ურთიერთობების კომიტეტის სხდომაზე იმყოფებოდა. მისი თქმით, სახელმწიფო გადატრიალების მცდელობის შემდეგ, სიკვდილით დასჯის აღდგენის საკითხი გააქტიურდა:

"ახლა საზოგადოება ემოციურად ძალიან დაძაბულია, დროთა განმავლობაში დავინახავთ, როგორ განვითარდება სიტუაცია".

თურქეთმა სიკვდილით დასჯა 12 წლის წინ გაააუქმა და ეს ნაბიჯი გახდა სწორედ საკვანძო იმისა, რომ ქვეყანა ევროკავშირის სამომავლო წევრად მოიაზრება.

ჩელიკის თქმით, სიკვდილით დასჯის აღდგენა კონსტიტუციის ცვლილებას გამოიწვევს, ორი მესამედი უმრავლესობით.

თურქეთის პარლამენტის დეპუტატმა, ასევე აღნიშნა რომ ცვლილება პოლიტიკოსების ძალიან დიდ კონსენსუსს მოითხოვს.

პრეზიდენტ რეჯიპ ტაიპ ერდოღანის მიერ გაკეთებულმა განცხადებამ, სიკვდილით დასჯის აღდგენის შესახებ, ევროპის ლიდერებისა და გერმანიის კანცლერის, ანგელა მერკელის განაწყენება გამოიწვია. ერდოღანის თქმით, თუკი თურქი ხალხი მოითხოვს სიკვდილით დასჯის აღდგენას, მაშინ ეს ასეც იქნება.

"ჩვენ ვერ ავუქცევთ გვერდს ხალხის მოთხოვნებს",- თქვა ერდოღანმა და ისიც დაამატა, რომ აშშ-ში დღემდე არსებობს სიკვდილით დასჯა.

ევროკავშირის ლიდერების განცხადებით, თურქეთში სასჯელის უმაღლესი ზომის, სიკვდილით დასჯის აღდგენა განმსაზღვრელი იქნება, მისი ევროკავშირის წევრად განხილვისას.

გერმანიის საგარეო საქმეთა მინისტრის, ფრანკ-ვალტერ შტაინმაიერის თქმით, ასეთი ცვლილება თურქეთთან წარმატებულ მოლაპარაკებებს, მისი წევრობის შესახებ, ხელს შეუშლის.