Google-ის ახალი სმარტფონის Pixel 3-ისა და Pixel 3 XL-ის პრეზენტაციამდე ჯერ კიდევ რამდენიმე თვეა დარჩენილი, თუმცა ინტერნეტში გაჟონილი სურათების დამსახურებით, მასზე უკვე ბევრი რამ ვიცით.

ბოლო დროს გავრცელებულ სურათებში ჩვენ Pixel-ის საბოლოო ვერსიას ვხედავთ. სურათებში ასევე გუგლის ახალი ყურსასმენიც ჩანს, რომელსაც ტრადიციული ჯეკის ნაცვლად USB-C ტიპის შესაერთებელი აქვს.

ფოტო: Канал Лучкова

სურათები რუსმა ბლოგერმა გაავრცელა და მასში წარმოდგენილი სმარტფონი რამდენიმე კვირის წინ გავრცელებულ სურათებს ემთხვევა, რაც მიუთითებს, რომ საქმე მართლაც ნამდვილ Google Pixel-თან გვაქვს. სურათებზე დაყრდნობით, სმარტფონს ეკრანზე სენსორებისა და კამერებისთვის საკმაოდ დიდი, შავი ჭრილი აქვს დატოვებული, რამაც ხალხის უკმაყოფილება გამოიწვია.

გავრცელებულ სურათებში USB-C ტიპის ყურსასმენებს ვხედავთ, რომელსაც Google ტელეფონს სავარაუდოდ უფასოდ მოაყოლებს. სმარტფონის ახლანდელ ვერსიას, Pixel 2-ს ყურსასმენების ნაცვლად მხოლოდ USB-C-დან სტანდარტულ 3.5-მილიმეტრიან ჯეკზე გადამყვანი მოყვება.

სავარაუდოდ, Google ახალი სმარტფონის პრეზენტაციას ოქტომბერში ჩაატარებს, თუმცა თუ გავითვალისწინებთ, რომ Pixel 3-ის შესახებ ინფორმაცია ყოველ კვირას ჟონავს, ოქტომბრისთვის მათ შესაძლოა ახალი ვერაფერი გვითხრან.

ფოტო: Канал Лучкова

ფოტო: Канал Лучкова