საქართველოს პრეზიდენტმა, გიორგი მარგველაშვილმა რუსეთ-საქართველოს ომის 10 წლისთავისადმი მიძღვნილ შეხვედრაზე განაცხადა, რომ, რუსეთი თავისი გეგმებით საქართველოს შეჩერებას ცდილობს, თუმცა ჩვენი ქვეყნის განვითარებას ეს მაინც ვერ შეუშლის ხელს.

"ჩვენ არაფრის დიდებით არ შევჩერდებით, არც ქვეყნის განვითარების თვალსაზრისით, არც დემოკრატიის გაღრმავების თვალსაზრისით, არც ევროკავშირში ინტეგრაციის თვალსაზრისით, არც ნატო-ში ინტეგრაციის თვალსაზისით", - განაცხადა მარგველაშვილმა შეხვედრაზე.

მისივე თქმით, აგრესორთან რბილი ლაპარაკი ცუდ შედეგებს მოიტანს და რუსეთის მიერ გადადგმულ ყველა ნაბიჯს საკუთარი სახელი უნდა ეწოდოს. პრეზიდენტის თქმით, გაჩუმების შემთხვევაში საფრთხეს საკუთარ თავსა და გარემოს ვუქმნით.

"აგრესორთან ენის მოჩლექით ლაპარაკი, პირდაპირ სიმართლის არ თქმა, არ დარქმევა აგრესიისა იმაზე, რაც არის პირდაპირი დარღვევა, როგორც საერთაშორისო სამართლის, ისე ადამიანური ნორმების, თუნდაც ორ ქვეყანას შორის მეზობლური ურთიერთობების ყველა პრინციპის დარღვევას, მაშინვე უნდა დარქმეოდა ყველაზე მძაფრი სახელი. ჩვენ არ უნდა გვეშინოდეს სიტყვების", - განაცხადა მარგველაშვილმა.

მარგველაშვილის აზრით, რუსეთის მიერ გამოვლენილი აგრესია არსებობს იმის გამო, რომ საქართველო დამოუკიდებელი ქვეყანაა და აქვს დამოუკიდებლობის ნება. იგი ამბობს იმასაც, რომ ომი საქართველოს წინააღმდეგ ბევრად ადრე, 1992-93 წლებში სწორედ ამ მიზეზით დაიწყო.

"ეს არის ომი საქართველოს წინააღმდეგ, ეს არის აგრესია, ეს არის ოკუპაცია და ეს არის საერთაშორისო სამართლის სრული დარღვევა", - აღნიშნა პრეზიდენტმა.

მარგველაშვილს თქმითვე, საქართველოს ორი ძირითადი სტრატეგია აქვს: აღდგეს საქართვლოს ტერიტორიულ მთლიანობა მშვიდობიანად და არ განიხილებოდეს სუვერენიტეტის ძალისმიერი მეთოდებით აღდგენა. იგი 2008 წლის ომის სიმძაფრეზეც საუბრობს და ამბობს, რომ 10 წლის წინ არ გვეყო იმის გამჭრიახობა, რომ შეგვეფასებინა, თუ რა ხდებოდა იმ წუთას საქართველოს ტერიტორიაზე.