კინომოყვარულები 2016 წლის აგვისტოს განსაკუთრებულად ელოდნენ, რადგან ამ დროს ეკრანზე DC-ის კომიქსების მიხედვით შექმნილი თვითმკვლელთა რაზმი გამოდიოდა. თანაც ვარსკვლავური შემადგენლობით - ჯარედ ლეტოს, ვაიოლა დევისის, უილ სმიტის, მარგო რობისა და კარა დელევინის სახელები ბევრისთვის საკმარისი აღმოჩნდა, რომ ფილმის გამოსვლამდე დღეების ათვლა დაეწყო.

ფილმის ამერიკული პრემიერა შედგა, თუმცა გახდება თუ არა ის წლის ჰიტი ჯერ არავინ იცის, თვითმკვლელთა რაზმმა მაყურებელსა და კრიტიკოსებში არაერთგვაროვანი რეაქცია გამოიწვია.

კრიტიკოსები ფილმს ნეგატიურად აფასებენ. მაგალითად, ScreenCrush-ის მეთ სინგერი ფილმს 10-დან მხოლოდ 3 ქულას უწერს:

“ფილმი პირველიდან უკანასკნელ სცენამდე აბსოლუტური არეულობაა, რომლის მსვლელობა, თხრობა და რადიო ჰიტების მყვირალა საუნდტრეკები მიუთითებს, რომ რეჟისორი პოსტ-პროდაქშენისას სასოწარკვეთილებაში იყო ჩავარდნილი”.

უკმაყოფილოა Cinemablend-ის ერიკ აიზენბერგიც:

“ფილმს აქვს იუმორის გრძნობა და სახალისოა, რასაც ერთვის ხმაურიანი და ენერგიული საუნდტრეკი, მაგრამ მისი შინაარსი და საბრძოლო სცენები მეორდება და მოსაბეზრებელი ხდება. ნაწყენი ვარ იმით, რომ თვითმკვლელთა რაზმში ანტაგონისტის ხაზი გაურკვეველი და ზოგადია".

მოკლედ, ფილმს, რომელსაც კომიქსების და ჰოლივუდური ბლოკბასტერების მოყვარულები სულმოუთქმელად ელოდნენ, თანაც ასეთი საოცარი ტრეილერების შემდეგ, საშინელი შეფასებები აქვს:

ჯეიმი გრეჰემი, Total Film:

“თვითმკვლელთა რაზმი სასიამოვნოდ იწყება, თუმცა მალევე ხდება საკმაოდ სუსტი. DC მარველთან შედარებით ჯერ კიდევ ბევრად უკან არის”.

ჯერმეინ ლასიერი, io9:

“დასამახსოვრებელი და შთამბეჭდავია მარგო რობის თამაში, მისი პერსონაჟი ქარაფშუტა და არაპროგნოზირებადია და მასთან ერთად აუდიტორიაც კარგად ერთობა. ის ყველა სცენას აძლიერებს და შეიძლება ითქვას, რომ თვითმკვლელთა რაზმი მხოლოდ მაშინ არის კარგი, როდესაც მარგო ჩანს ეკრანზე".

სტეფანი ზაქარეკი, Time:

“ჰარლი ქუინის (მარგო რობი) შემოსვლა თვითმკვლელთა რაზმის საუკეთესო მომენტია. რობი დანაშაულებრივად მომხიბვლელი მსახიობია, ეს ფილმიც მხოლოდ იმად ღირს, რომ მის ნიჭში დავრწმუნებულიყავით, შესაბამისად შეგვიძლია ვთქვათ, რომ ფილმმა მას კარგი სამსახური გაუწია”.

დევიდ ელრიხი, Indiewire:

“ჯარედ ლეტო ნაწილობრივ განგსტერია, ნაწილობრივ კლოუნი. პრინციპში, შეგვიძლია მას ყველაფერი ვუწოდოთ, მაგრამ ის ნამდვილად არ არის ფილმის ნაწილი. რეჟისორმა ვერ მოახერხა, რომ გმირი, რომელსაც მაყურებელი ყველაზე მეტად ელოდა, სენსაციურად წარმოეჩინა”.

რიჩარდ ლოუსონი, Vanity Fair:

“ჯარედ ლეტოს ჯოკერი ამ წყეულ ფილმში იშვიათად ჩანს, თუმცა ამის მიუხედავად შეიძლება ითქვას, რომ როდესაც ის ფილმშია, სრულიად გასაოცარია”.

კრიტიკოსების აზრს კატეგორიულად არ ეთანხმებიან DC-ის ფანები და ზოგიერთი მათგანი კინომცოდნეებს DC-ის მიმართ მიზანმიმართულ ბრძოლაშიც კი ადანაშაულებენ.

ამასობაში, საიტი Rotten Tomatoes დახურვის მოთხოვნით ფანებმა პეტიცია შეადგინეს. Rotten Tomatoes ავტორიტეტული საიტია, სადაც ფილმებს მაყურებელთან ერთად კრიტიკოსებიც აფასებენ. თვითმკვლელთა რაზმს პოზიტიური შეფასება საიტის კრიტიკოსთა მხოლოდ 31 პროცენტმა დაუწერა.

მოკლედ, ნახეთ ფილმი, რომელიც საქართველოს კინოთეატრებში 4 აგვისტოდან გამოდის და თავად გამოიტანეთ დასკვნები.