"2013 წელს მე არ ვიყავი პარტიის წევრი და უბრალოდ მხარს მიჭერდა მმართველი პარტია", - ასე გამოეხმაურა პრეზიდენტი გიორგი მარგველაშვილი საპრეზიდენტო არჩევნებზე ქართული ოცნების მიერ დამოუკიდებელი კანდიდატის მხარდაჭერას.

"შესაბამისად, იმ კანდიდატმა და ქართულმა ოცნებამ უნდა უპასუხოს ერთ კითხვას - ხუთი წლის განმავლობაში მე რომ მაყვედრიდა მმართველი პარტია, რომ თურმე ჩემ გვერდში იდგა არჩევნებში, აქედან გამომდინარე ყველაფერზე უნდა მომეწერა ხელი, რასაც მმართველი პარტიის პოლიტსაბჭო გადაწყვეტდა, რანაირ დამოუკიდებელ კანდიდატზე გვაქვს სუბარი" , - განაცხადა პრეზიდენტმა ბრიფინგზე.

ბრიფინგზე პრეზიდენტმა განაცხადა, რომ 2018 წლის საპრეზიდენტო არჩევნები ამ წლის 28 ოქტომბერს გაიმართება.

მმართველი პარტიის განცხადებით, საპრეზიდენტო არჩევნებზე ისინი დამოუკიდებელ კანდიდატს დაუჭერენ მხარს. მედიაში აქტიურად განიხილება, რომ ეს კანდიდატი პარლამენტის წევრი სალომე ზურაბიშვილი იქნება. როგორც ცნობილია, ზურაბიშვილი საფრანგეთის მოქალაქეობაზე უარს ამბობს.

ეკა ბესელიამ 30 ივლისს ჟურნალისტებთან საუბრისას აღნიშნა, რომ ქართული ოცნება მას შემდეგ დაასახელებს საპრეზიდენტო კანდიდატს, რაც ყველა სხვა კანდიდატი გახდება ცნობილი. მისივე თქმით, მას მოსწონს იდეა, რომ საპრეზიდენტოდ დამოუკიდებელი ქალი კანდიდატი დასახელდეს.

მსგავსი განცხადება ქართული ოცნების თავმჯდომარე ბიძინა ივანიშვილმა 24 ივლისს პირველ არხთან მიცემულ ინტერვიუში გაავრცელა. ივანიშვილი ამბობდა, რომ მისი პოზიციაა, დამოუკიდებელ კანდიდატს დაუჭირონ მხარი და თუ ასე არ იქნება, მაშინ "ოპოზიციამ გაინაწილოს ეს მანდატი".

ანალოგიურად ფიქრობს საქართველოს პრემიერ-მინისტრი მამუკა ბახტაძე. მისი თქმით, თუ კი ქართულ ოცნებას საკუთარი კანდიდატი არ ეყოლება, ეს დემოკრატიისთვის უკეთესი იქნება.