მუსიკალური ფესტივალი Echowaves ანაკლიაში 23-დან 26 აგვისტოს ჩათვლით გაიმართება. ჟანრობრივად განსხვავებულ 5 სცენაზე მსმენელის წინაშე 150-მდე არტისტი წარდგება. მათ შორის, სამხრეთაფრიკული დუეტი Die Antwoord და ინგლისელი შემსრულებელი Tricky-ც იქნებიან.

ფესტივალზე სულ ხუთი სცენაა:

  1. MAIN Stage;
  2. EYE Stage;
  3. AQUA Stage;
  4. TAIYO Stage;
  5. KHIDI Stage.

ანაკლიაში ფესტივალის ტერიტორიაზე მშენებლობის პროცესი რამდენიმე კვირის წინ დაიწყო. პირველი სცენა, რომლის კონსტრუქციაც აიგო, EYE Stage იყო. EYE Stage-ზე ამჟამად ბოლო დეტალების დამატება მიმდინარეობს, ბოლო კვირაში კი ხმის სისტემა და განათება დამონტაჟდება.

როგორც ფესტივალის კონსტრუქციების ხელმძღვანელმა, ნიკა ქობულაშვილმა On.ge-ს უთხრა, ამ ეტაპზე ფესტივალის ტერიტორიაზე ყველგან მუშაობაა გაჩაღებული.

"ვაკეთებთ ჩრდილებს, რაც ყველაზე მნიშვნელოვანი იყო და აქამდე არ ყოფილა. დაწყებულია ტაიო სთეიჯის გაკეთება, აი სთეიჯი კი თითქმის დასრულებულია. ახლა ვიწყებთ ინსტალაციებს. ხიდის სთეიჯი იქნება უფრო ღამის ეპიცენტრი, ხოლო ტაიოსი - დღის".

Echowaves-ის საზოგადოებასთან ურთიერთობების მენეჯერი ხატია გელოვანი On.ge-ს ტაიოს სცენაზე უყვება, რომელსაც ფესტივალის ტერიტორიაზე განსაკუთრებული დატვირთვა აქვს.

"ამ ეტაპზე TAIYO-ს მშენებლობა მიმდინარეობს. სცენა მთლიანად ბამბუკისგან იქნება შექმნილი. მის კონსტრუირებაზე სპეციალურად ბრაზილიიდან ჩამოსული დიზაინერი ჯონატას გალანტინი მუშაობს, რომელსაც ამ სფეროში დიდი გამოცდილება აქვს"

TAIYO Stage

ფოტო: Echowaves

ჯონატასის გარდა, სცენას ინტერნაციონალური გუნდიც აწყობს, რომელთაც არაერთი დიდი ფესტივალის დეკორაციების შექმნაში აქვთ მონაწილეობა მიღებული, მაგალითად, Boom Festival-ის.

TAIYO Stage

ფოტო: Echowaves

"ბამბუკის კონსტრუქცია შემთხვევით არ შეგვირჩევია - TAIYO-ს შექმნის იდეა იაპონური კულტურის გავლენით გაგვიჩნდა, თუკი სადმე გვხვდება მცენარეული მოტივი, ის მცენარე აუცილებლად ბამბუკია. სწორედ იაპონიიდან იწყება ბამბუკის, როგორც სამშენებლო მასალის გამოყენება და ერთი სიტყვით - იაპონელებისათვის ბამბუკი უმნიშვნელოვანესია, ვიზუალურად კი ჩვენს სტილს მოუხდა", - გვითხრა ხატიამ.

კითხვაზე, თუ რა კონცეფციას ატარებს და რომელ არტისტებს უმასპინძლებს ტაიოს სცენა, ხატია გვპასუხობს:

"მზესთან სიახლოვე და მისგან მიღებული ენერგია TAIYO Stage-ის მთავარი ელემენტი იქნება. სცენის მთავარი ინსტალაციაც, რომლის აგებასაც უახლოეს მომავალში დავიწყებთ, სწორედ ამისი გამოხატულებაა.

TAIYO Stage

ფოტო: Echowaves

გვსურს, ეს სცენა სწორედ ის ადგილი გახდეს, რომელიც კიდევ ერთხელ შეგვახსენებს, რომ არსებობს მომენტები, რომელთა განსაცდელადაც ყველაფერი ღირს. Taiyō - იაპონური სიტყვაა და მზეს ნიშნავს, თუმცა ძველ იაპონურ ლიტერატურაში ტაიოს იეროგლიფი მხატვრულადაც გამოიყენებოდა და ოკეანეს აღნიშნავდა. ტაიოს სცენის სამუშაო საათებიც მზის ამოსვლასა და ჩასვლას უკავშირდება".

მსმენელი TAIYO Stage-ზე ისეთ შემსრულებლებს მოისმენს, როგორებიც არიან NU, Henry SAIZ & THE BAND, Dominik Eulberg, FRANCESCO TRISTANO & GUTI პროექტით Another Paradise.

სულ ცოტა ხნის წინ, ფესტივალის დღიური ლაინაფი გახდა ცნობილი. ამ ეტაპზე 4-დღიანი ფესტივალის ღირებულება 150 ლარია, ხოლო ერთი დღით ფესტივალზე დასწრება - 60 ლარი. თუ იჩქარებთ, სწორედ ამ ფასად შეძლებთ გამორჩეული შემსრულებლების მოსმენას ანაკლიაში.

ამავე თემაზე: