ხაიშსა და ჭუბერში ხე-ტყის უკანონო ჭრასთან დაკავშირებით ფინანსთა სამინისტროს საგამოძიებო სამსახური საგამოძიებო მოქმედებებს ახორციელებს. ამის შესახებ ინფორმაცია On.ge-ს ფინანსთა სამინისტროში დაუდასტურეს.

უწყების პრესსამსახურში დამატებით დეტალებს ვერ ასაჯაროვებენ, თუმცა აცხადებენ, რომ ოპერაციაში სპეციალური დანიშნულების რაზმის ჩართვა გახდა საჭირო. სავარაუდოდ, საგამოძიებო მოქმედებებს მოსახლეობის მხრიდან პროტესტი მოყვა.

თავდაპირველად, ხაიშსა და ჭუბერში სპეცოპერაციის შესახებ ინფორმაცია ადგილობრივებმა გაავრცელეს.

"ხე-ტყის უკანონოდ მოპოვების აღკვეთის მოტივით, დაახლოებით, 1000-12000 პოლიციელია შემოსული ხაიშსა და ჭუბერის თემებში. ხელისუფლება კვლავ ხელების გადაგრეხის პოლიტიკით მუშაოს. არავითარი ხე-ტყე, არც სოფლის მეურნეობისა თუ ტურიზმის წახალისება… მხოლოდ ჰესები და ოქროს წარმოება!",- ვკითხულობთ ფეისბუქზე.

პრემიერ-მინისტრმა დღეს გამართულ პრესკონფერენციაზე განაცხადა, რომ ხე-ტყის უკანონო ჭრა ქვეყანას გამოუსწორებელ ზიანს აყენებს. ბახტაძემ განაცხადა, რომ მთავრობის რეაგიერება იქნება მკაცრი და ახალი რეგულაციების დაწესება იგეგმება.