ზუგდიდიდან თბილისისკენ მიმავალი მატარებელი ძაბვის ვარდნის გამო გზაში ერთ საათზე მეტ ხანს გაჩერდა. ინფორმაცია მატარებლის გაჩერების შესახებ მგზავრებმა გაავრცელეს და On.ge-სთან საუბრისას საქართველოს რკინიგზამაც დაადასტურა.

რკინიგზაში ამბობენ, რომ მატარებელი დაახლოებით ერთი საათი იყო გაჩერებული და თბილისის მიმართულებით უკვე წამოსულია. საპირისპირო ინფორმაციას ავრცელებენ მგზავრები. ერთ-ერთი მგზავრი, რუსუდან ჭანტურაია ფეისბუქზე წერს, რომ მატარებელი სამ საათზე მეტ ხანს იყო გაჩერებული და ახლა ელმავალი მივიდა, რომელმაც გაჩერებული მატარებელი გორამდე უნდა ჩაიყვანოს.

"საქართველოს რკინიგზის ხაშური-გორის მონაკვეთზე უკვე საათ-ნახევარია ჯორივით დგას ზუგდიდი - თბილისის ჩქაროსნული მატარებელი 320 მგზავრით, სრულ სიბნელეში. კარები დაბლოკილია უდენობის გამო. პატარა ბავშვებითაა სავსე, ჰაერი არ ყოფნით. სასწაული სიცხეა. პატრონი არ ჰყავთ [საქართველოს რკინიგზას] ისევე, როგორც ამ ქვეყანას, ხალხი შველას ითხოვს, იქნებ ვინმე კეთილშობილმა ადამიანმა აცნობოს სადგურის მორიგეს და უშველოს პატარებს და მერე დიდებს!", - დაწერა დაახლოებით ერთი საათის წინ ვახტანგ ჩიკვატიამ ფეისბუქზე.

გაჩერდა თუ არა სხვა მატარებლებიც გზაში, ამის კითხვაზე საქართველოს რკინიგზაში ამბობენ, რომ 23 ივლისს, დღის განმავლობაში უპასუხებენ.