"თუ აშშ-სა და რუსეთს შორის ურთიერთობები არ დალაგდება, მე ვლადიმერ პუტინის ყველაზე დიდი მტერი ვიქნები, რომელიც ოდესმე ჰყოლია", - განაცხადა პრეზიდენტმა, დონალდ ტრამპმა CBS-თან ინტერვიუში, რომლის სრული ვერსია დღეს, 21 ივლისს გამოქვეყნდება.

ინტერვიუში ტრამპმა რუსეთთან პოლიტიკის გამო ისევ გააკრიტიკა თავისი წინამორბედი, ბარაკ ობამა და თქვა, რომ თვითონ იმაზე უფრო მეტად მკაცრია რუსეთის მიმართ, ვიდრე ნებისმიერი სხვა პრეზიდენტი წლების განმავლობაში.

მიუხედავად იმისა, რომ საგამოძიებო სამსახურები 2016 წელს საპრეზიდენტო არჩევნებში რუსეთს ადანაშაულებენ, ტრამპმა აღნიშნა, რომ რუსეთთან ურთიერთობის გაუმჯობესების შესაძლებლობები შეაფასა:

"პრეზიდენტ პუტინთან და რუსეთთან ურთიერთობის დალაგება პოზიტიურია და არა ნეგატიური".

19 ივლისს თეთრი სახლის პრესმდივანმა, სარა სანდერსმა ტვიტერზე დაწერა, რომ აშშ-ის პრეზიდენტი დონალდ ტრამპი აპირებს, რუსეთის პრეზიდენტი ვლადიმერ პუტინი ვაშინგტონში ამ წლის შემოდგომაზე მიიწვიოს.

16 ივლისს ჰელსინკიში აშშ-სა და რუსეთის ლიდერებმა პირისპირ ორ საათზე მეტხანს ისაუბრეს და შემდეგ ერთობლივ პრესკონფერენციაზე ჟურნალისტების კითხვებს უპასუხეს. დონალდ ტრამპის ზედმეტად რბილმა ტონმა და ამერიკული სადაზვერვო სამსახურების მიმართ მისმა უნდობლობამ ამერიკელი სენატორებისა და კონგრესმენების იმედგაცრუება გამოიწვია.

დონალდ ტრამპმა ჰელსინკის შეხვედრის დროს თავდაპირველად განაცხადა, რომ ვერ ხედავდა მიზეზს, რატომ შეიძლება რუსეთი 2016 წლის არჩევნებში ჩარეულიყო. მოგვიანებით კი ამერიკაში დაბრუნებისას თქვა, რომ შეცდომა დაუშვა და საპირისპიროს გულისხმობდა: კერძოდ კი, ფრაზას - "ვერ ვხედავ მიზეზს, რატომ არ ჩაერეოდა რუსეთი არჩევნებში".

CBS-ის ჟურნალისტის კითხვაზე, არის თუ არა პუტინი პასუხისმგებელი არჩევნებში ჩარევაზე, პრეზიდენტმა უპასუხა: "დიახ, არის. როგორც მე ვარ ამ ქვეყანაში მომხდარ მოვლენებზე პასუხისმგებელი, ისევე არის პუტინიც რუსეთთან დაკავშირებით. როგორც ქვეყნის ლიდერს, სწორედ მას ვაკისრებ პასუხისმგებლობას".

ეს პირველი შემთხვევაა, როცა დონალდ ტრამპმა ღიად დაადასტურა აშშ-ის საარჩევნო პროცესში რუსეთის კვალის არსებობა.