დეპუტატი დავით ჭიჭინაძე ქართული ოცნებიდან მისი გარიცხვის გადაწყვეტილებას ეხმაურება და პარლამენტის თავმჯდომარესა და ოცნების სხვა ლიდერებს აკრიტიკებს.

მისი თქმით, პარტიამ სწორი გადაწყვეტილება მიიღო, რადგან არსებულ გუნდში მისნაირი ადამიანის ადგილი არ არ იყო.

"ეგეთ ადამიანებთან, ეგეთ ლიდერებთან ნამდვილად არ არის ჩემი და ჩემნაირი ხალხის გზა და ჩვენ აბსოლუტურად სხვანაირად ვუყურებთ ამ ცხოვრების მომავალს. მე ვფიქრობ, რომ ქართული ოცნება, რომელიც 2012 წელს მოვიდა ხელისუფლებაში, აბსოლუტურად სხვა ღირებულებებით მოვიდა, არა მლიქვნელობით", - განუცხადა დეპუტატმა ტელეკომპანია იმედს.ჭიჭინაძემ ქართული ოცნების ე.წ. ახალგაზრდების ჯგუფი სააკაშვილსაც შეადარა.

"ეს სააკაშვილსაც ჰქონდა, მასზე ჭკვიანი, მასზე ლამაზი და მასზე ტანადი მის პარტიელებს არავინ არ ეგონათ და თუ ამ ცხოვრებით უნდათ გააგრძელონ არ ვიცი... პორტირებულები, კოლექტიური ზარდიაშვილები არიან და მათ მეტი ლოგიკა არ გააჩნიათ. ზარდიაშვილი და მდინარაძე რომ გეჯდება პირველ რიგში... საერთოდ, ჩუგოშვილმა ყველა მოლოდინს გადააჭარბა - არ მეგონა, რომ ორი წელი პარლამენტარიზმი იმის გამო დასჭირდებოდა, რომ როგორღაც მისი ეთიკური და მორალური ღირებულებები ზაქარია ქუცნაშვილის მორალურ და ეთიკურ ღირებულებებს დამთხვეოდა", - განაცხადა დეპუტატმა.

მან მოუწოდა ქართული ოცნების მხარდამჭერებს იბრძოლოდ, რათა პარტია ფლიდებისა და მლიქვნელების პარტიად არ გადაიქცეს.

საჯარო განცხადებების გამო ქართული ოცნების სამდივნოს გადაწყვეტილებით, პარლამენტის დეპუტატი დავით ჭიჭინაძე პარტიიდან გარიცხეს. ოფიციალურ განცხადებაში ნათქვამია, რომ ჭიჭინაძემ შეურაცხყოფა მიაყენა პოლიტიკური გუნდის წევრებს და ზიანი მიაყენა პარტიის იმიჯსა და ინტერესებს.

ქართული ოცნებიდან გარიცხვის შემდეგ გირჩი დავით ჭიჭინაძეს თანამშრომლობას სთავაზობს. გირჩის განმარტებით, ისინი იზიარებენ დეპუტატის მიერ საჯაროდ გაჟღერებულ კრიტიკას პარლამენტის სპიკერის, ირაკლი კობახიძის მიმართ. დავით ჭიჭინაძე On.ge-სთან საუბრისას გირჩის შეთავაზებას გამოეხმაურა. მისი თქმით, ქართული ოცნების იდეების ერთგული რჩება.

ბოლო რამდენიმე დღეა დავით ჭიჭინაძე პარლამენტის თავმჯდომარეს, ირაკლი კობახიძეს აკრიტიკებს. მან განაცხადა, რომ ირაკლი კობახიძის მეთაურობით პარლამენტის ავტორიტეტი ძალიან დაბალია.

დეპუტატმა პარლამენტის თავმჯდომარე კიდევ ერთხელ მას შემდეგ გააკრიტიკა, რაც ჭიჭინაძემ აღნიშნა, რომ კობახიძე და მაშინდელი პრემიერი, გიორგი კვირიკაშვილი "ადამიანების სიცოცხლის ხარჯზე კომპრომისზე წავიდნენ".

"თმენის ვალდებულება მართლა დეპუტატებს გვაქვს, რომ ასეთ თავმჯდომარეს ვითმენთ", - თქვა ჭიჭინაძემ.