ტყიბულში მინდელის შახტის წინ მეშახტეები აქციას მართავენ. ტყიბულის პირველადი პროფკავშირის ხელმძღვანელი გაგა ისაკაძე On.ge-სთან საუბარში ამბობს, რომ მეშახტეები პრემიერ-მინისტრ მამუკა ბახტაძისგან მოითხოვენ დოკუმენტს, სადაც წერილობით იქნება დადასტურებული, რომ ისინი მიიღებენ ხელფას, სანამ შახტში საგამოძიებო მოქმედებები დასრულდება.

ისაკაძის თქმით, მეშახტეები დოკუმენტაციის გარდა მინდელის შახტის ადგილობრივი მენეჯმენტის გადადგომასაც ითხოვენ:

"მოგვცენ დამადასტურებელი დოკუმენტი იმის შესახებ, რომ გამოძიების შემდეგ შახტები არ დაიხურება. მოხდეს შახტების რეაბილიტაცია".

16 ივლისს მინდელის შახტაში მომხდარი აფეთქების შედეგად კიდევ 4 მუშა გარდაიცვალა. შინაგან საქმეთა სამინისტრომ 25-ვე შახტი გამოძიების დასრულებამდე დალუქა. საქმის შეფასებისას მამუკა ბახტაძემ განაცხადა, რომ მინდელის შახტის დახურვის განმავლობაში დასაქმებულებს აუნაზღაურდებათ ხელფასები.