ტურინის იუვენტუსის რიგებში გამართულ პირველ პრესკონფერენციაზე პორტუგალიელმა ფეხბურთელმა კრიშტიანუ რონალდუმ თავის ახალ კლუბს ასეთი შესაძლებლობისთვის მადლობა გადაუხადა, რადგან, მისი თქმით, მისი ასაკის ფეხბურთელები, როგორც წესი, კატარსა და ჩინეთში მიდიან.

"ასეთ ასაკში ამ კლუბში თამაშის შესაძლებლობით ძალიან ბედნიერი ვარ. გამარჯვება მწყურია. მინდა, რომ საუკეთესო ვიყო. [...] ფიზიკურად და მენტალურად თავს ძალიან კარგად ვგრძნობ. აქ ყოფნაც სწორედ ამიტომ მიხარია".

"იმ ფეხბურთელებისგან განვსხვავდები, რომლებიც ფიქრობენ, რომ ჩემს ასაკში კარიერა დასრულებულია. მინდა დავამტკიცო, რომ მათ არ ვგავარ. აქ ყოფნა ჩემთვის ძალიან ემოციურია, რადგან 23-ს კი არა, 33 წლის ვარ", - განაცხადა რონალდუმ.

იგი იმედოვნებს, რომ ახალ კლუბს უფრო მაღალ საფეხურზე აიყვანს.

"ვიცი, რომ ყველა კლუბს სურს ჩემპიონთა ლიგის მოგება. ჩვენც ასე ვიქნებით, თუმცა არც სერია ა უნდა დაგვავიწყდეს. [...] იმედი მაქვს იუვეს იღბლიანი ვარსკლავი ვიქნები".

"იუვენტუსმა არაჩვეულებრივი შანსი მომცა და მადლიერი ვარ. მათ ჩემი სათამაშო სტილი დააფასეს. ვამაყობ, რომ ჩემ მიმართ ინტერესი გამოიჩინეს. იმედია, იუვენტუსს ახალ საფეხურზე ასვლაში დავეხმარები".