თუ ბოლო დროს შეამჩნიეთ, რომ თქვენი თანამშრომლები მარტივ საქმეებს ვერ უმკლავდებიან, თუ თქვენი მენეჯერი სულელურ დავალებებს გაძლევთ, ან თუნდაც ფიქრობთ, რომ ბოლო კვირაში თქვენი კოლეგების IQ ერთბაშად დაეცა ამას შეიძლება ერთი მარტივი ახსნა ჰქონდეს.

ჰარვარდის მეცნიერებს თუ დავუჯერებთ ამ ყველაფრის უკან შეიძლება ზაფხულის სიცხე იდგეს.

ეს ხუმრობა არ არის, ბოლო რამდენიმე კვირის განმავლობაში მსოფლიოს უამრავ ქალაქში გაუსაძლისი სიცხეებია. ჰარვარდის მეცნიერებმა კი სტატიის გამოსაქვეყნებლად იდეალური დრო შეარჩიეს. მათი კვლევის მიხედვით ძლიერი სიცხის დროს ადამიანები დაახლოებით 13 პროცენტით უფრო სულელურად იქცევიან, ვიდრე ნორმალურ ტემპერატურაზე.

ისინი კვლევის ფარგლებში თვალყურს ბოსტონში მცხოვრებ 44 სტუდენტს ადევნებდნენ, რომლებიც იყვნენ ერთი ასაკის, დადიოდნენ ერთ კოლეჯში და ერთმანეთთან ახლოს ცხოვრობდნენ. მათ შორის ერთადერთი განსხვავება იყო ის, რომ მათი ნახევარი გარემონტებულ, კონდინციონერიან ოთახებში ცხოვრობდა, ხოლო მეორე ნახევარი კი ძველ შენობაში, რომელსაც გაგრილების სისტემა არ ჰქონდა.

ფოტო: Thibault Camus / AP Photo

ყოველ დილით სტუდენტებს ტელეფონში პატარა ტესტის გაკეთება ევალებოდათ. ტესტები აზროვნების სისწრაფეს, კონცენტრაციას და სხვა მახასიათებლებს ზომავდა. ჩვეულებრივ სტუდენტები თანაბარ შედეგს აჩვენებდნენ. ცხელი პერიოდის დროს კი ჯგუფის იმ ნაწილს, რომელიც ძველ შენობაში ცხოვრობდა ტესტში 13 პროცენტით უფრო ცუდი შედეგი ჰქონდა.

აღსანიშნავი ისაა, რომ აგრილების შემდეგაც კი, მათი ტესტების პასუხების გაუმჯობესებას რამდენიმე დღე დასჭირდა.

მეცნიერები ამბობენ, რომ ამ ტიპის კვლევები მნიშვნელოვანია, რადგან გლობალური დათბობის პირობებში ასეთი ცხელი პერიოდები უფრო გახშირდება და ადამიანზე მაღალი ტემპერატურის გავლენაც უფრო აშკარა გახდება.

ამავე თემაზე:

ნახეთ, რა უნდა გააკეთოთ სიცხეში სწორი ტემპერატურის შესანარჩუნებლად