ოკუპირებული აფხაზეთის დე ფაქტო პრეზიდენტი, რაულ ხაჯიმბა 15 ივლისს მოსკოვში ფეხბურთის მსოფლიო ჩემპიონატის ფინალს დაესწრება.

"ეს გრანდიოზული სპორტული ღონისძიებაა. ჩვენ არ შეგვიძლია, რომ არ გაგვიხარდეს ჩვენი მეზობლისა და მოკავშირის გამო. ჩემპიონატი უმაღლეს დონეზეა ორგანიზებული. რუსეთის ეროვნულმა ნაკრებმა ღირსეულად იასპარეზა და გულშემატკივრების იმედები გაამართლა. დარწმუნებული ვარ, რომ ადრე თუ გვიან ჩვენი ეროვნული ნაკრები მსოფლიო ფეხბურთის მნიშვნელოვანი მოვლენის მონაწილე გახდება", - წერია ოფიციალურ განცხადებაში.

14 ივნისს მსოფლიო ჩემპიონატის გახსნის ცერემონიას ხაჯიმბა ოკუპირებული ცხინვალის დე ფაქტო პრეზიდენტთან, ანატოლი ბიბილოვთან ერთად დაესწრო. ისინი რუსეთის პრეზიდენტ ვლადიმერ პუტინთან და სხვა ლიდერებთან ერთად ლოჟაში ისხდნენ.