მოდი ყველაფერი დასაწყისშივე ნათელი გავხადოთ, ბერმუდის სამკუთხედში არაფერი ზებუნებრივი არ ხდება. ბერმუდს, პუერტო რიკოს და ფლორიდის შორის არსებულ ჰიპოთეტურ სამკუთხედში თვითმფრინავები და გემები ზუსტად ისეთივე სიხშირით იკარგება, როგორც დედამიწის ნებისმიერ სხვა ადგილას. მიუხედავად იმისა, რომ საკმაოდ ბევრი სხვადასხვა ბუნებრივი მოვლენა არსებობს, რომელსაც ოკეანეში გემების ჩაძირვა შეუძლია თითქმის არცერთი მათგანი ბერმუდის სამკუთხედში არ გვხვდება.

"ბერმუდის სამკუთხედი ახლოს არის ეკვატორთან, იქვეა ამერიკის მდიდარი მოსახლეობის დიდი ნაწილიც, ამ ყველაფრის გამო ამ ადგილას გემები და თვითმფრინავები უფრო ხშირად გადაადგილდებიან. ამის გამო კი ჩნდება განცდა, რომ ბერმუდის სამკუთხედში კატასტროფები უფრო ხშირად ხდება. თუმცა სინამდვილე ისაა, რომ ამ რეგიონში პროცენტულად ზუსტად იმდენივე კატასტროფა ხდება, რამდენიც ნებისმიერ სხვა ადგილას", - ამბობს კარლ კრუსზელნიცკი, ავსტრალიელი სამეცნიერო კომუნიკატორი.

ბერმუდის სამკუთხედის შესახებ ლეგენდები მას შემდეგ გაჩნდა, როდესაც პირველი და მეორე მსოფლიო ომის დროს ამ რეგიონში ბევრი ხომალდი დაიკარგა, რაც გასაკვირი სულაც არ არის. ცუდი ამინდი, გაუმართავი ნაკლებად გამძლე გემები და თვითმფრინავები აღნიშნულ კატასტროფებს საკმარისად კარგად ხსნის.

ოკეანისა და ატმოსფეროს საერთაშორისო ადმინისტრაციის განცხადებით ბერმუდის სამკუთხედი ოფიციალურად არც არსებობს.