სამწუხაროდ თუ საბედნიეროდ, ქართველები ჩვენს ტბებსა თუ მდინარეებში ნიანგების ნახვით სულაც არ ვართ განებივრებულები.

სამაგიეროდ, მსოფლიოში არსებობს ქვეყნები, სადაც ძალიან საშიში ქვეწარმავლები ცხოვრობენ და, რა თქმა უნდა, მათ შორის მოწინავე ადგილს ავსტრალია იკავებს.

დღეს სწორედ ავსტრალიელ რეინჯერებზე მოგიყვებით, რომლებმაც მრავალწლიანი დევნის შემდეგ, გიგანტური, 600-კილოგრამიანი ნიანგი დაიჭირეს. სიგრძეში რეპტილია 5 მეტრს აღწევდა.

პირველად ეს უზარმაზარი ცხოველი 8 წლის წინ, 2010 წელს, ველურ ბუნებაში აღმოაჩინეს და მას შემდეგ მისი ძებნა არც შეუწყვეტიათ.

ფოტო: cnn

რეკორდული ზომის ნიანგი, რომელიც დაახლოებით 60 წლის არის, ავსტრალიაში მდინარე კატრინის ნაპირზე ბინადრობდა.

აღსანიშნავია, რომ ის 2011 წელს აღმოჩენილ 4.5 მეტრის ზომის ნიანგზე გაცილებით დიდი და მასიურია.

ადამიანებზე შესაძლო თავდასხმის თავიდან ასაცილებლად, სუპერ ნიანგი აღმოჩენისთანავე კატრინის რეგიონის ნიანგების ფერმაში გადაიყვანეს, რათა მისი იზოლირება მომხდარიყო.

ჩვენ კი ისღა დაგვრჩენია, ვეებერთელა ცხოველს უზრუნველი ცხოვრება და ვიზუალურად არანაკლებად შთამბეჭდავი შთამომავლობა ვუსურვოთ.