ირანელი ქალები საკუთარი ცეკვის ვიდეოებს ონლაინ აქვეყნებენ და ასე უჭერენ მხარს თინეიჯერ ბლოგერს, რომელიც ცეკვისთვის დააპატიმრეს.

მედა ჰოჰაბრი ინსტაგრამზე ვიდეოებს აქვეყნებდა, რომლებშიც ის ირანულ და დასავლურ პოპ-მუსიკაზე ცეკვავდა.

პარასკევს, სახელმწიფო ტელევიზიამ დაპატიმრებული თინეიჯერის აღიარება გამოაქვეყნა.

სოციალური მედიის მომხმარებლები ახალგაზრდა ბლოგერსა და მოცეკვავეს მხარს უჭერენ და იყენებენ ჰაშტაგს, რომელიც ითარგმნება, როგორც "ცეკვა დანაშაული არ არის".

ირანის მთავრობას ქალების ჩაცმულობაზე მკაცრი კანონები აქვს. ქვეყანაში საპირისპირო სქესის წარმომადგენელთან საჯარო ცეკვა ქალებს ეკრძალებათ, გამონაკლისია შემთხვევა, როცა გარშემომყოფებს მხოლოდ ოჯახის წევრები წარმოადგენენ.

ჰოჰაბრის ვიდეოში ჩანდა, რომ ის ჰიჯაბს, ან სავალდებულო თავსაბურავს, არ ატარებდა და ისე ცეკვავდა სახლში.

"მსოფლიოს ნებისმიერ წერტილში, ვინმეს რომ უთხრა, რომ 17-18 წლის გოგოებს ცეკვისთვის, ბედნიერებისთვის, სილამაზისთვის და საკუთარი თავისუფლების გამოხატვისთვის აპატიმრებენ, მაშინ, როცა ბავშვებზე ძალადობაში დამნაშავენი და სხვა კრიმინალები თავისუფალნი არიან, ისინი გაიცინებენ, რადგან ეს უბრალოდ დაუჯერებელია", - წერს ერთ-ერთი ბლოგერი.

სხვა ქალები კი, ტვიტერზე თავიანთ ვიდეოებს აქვეყნებენ.

"თეირანის საჯარო პარკში ვცეკვავ, რომ დავეხმარო 19 წლის გოგოს, რომელიც ცეკვისთვის დააპატიმრეს"

"ვცეკვავ, ასე რომ მთავრობა დაინახავს, რომ ვერ წამართმევს ბედნიერებასა და იმედს, თინეიჯერი გოგოების დაპატიმრებით".