სახელმწიფო უსაფრთხოების სამსახურის განცხადებით, ქრთამის აღების ბრალდებით, დაკავებულია ვეტერანთა და მეომართა ვაზიანის კავშირის ხელმძღვანელი მიხეილ გერგაული. მასთან ერთად, იგივე ბრალდებით დააკავეს გენერალური შტაბის სამხედრო პოლიციის დეპარტამენტის მონიტორინგის მთავარი სამმართველოს განყოფილების უფროსი გიორგი გ.

გამოძიების ვერსიით, ბრალდებულები თავდაცვის სამინისტროს ყოფილი თანამშრომლის შვილს თელავში, სამხედრო ქალაქის დასახლებაში მდებარე საცხოვრებელი ფართის მუდმივ სარგებლობაში და შემდგომ საკუთრებაში გადაცემას დაჰპირდნენ, რის სანაცვლოდაც ქრთამის სახით 4 000 ლარის გადახდა მოსთხოვეს.

სუს-ის განცხადებით, 27 ივნისს, ბრალდებულებმა კახეთის გზატკეცილზე მდებარე სავაჭრო ცენტრ - ლილო-მოლის მიმდებარე ტერიტორიაზე აღნიშნულ მოქალაქეს ქრთამის სახით მოთხოვნილი თანხის ნახევარი - 2 000 ლარი გამოართვეს, ხოლო 2018 წლის 29 ივნისს - თანხის დარჩენილი ნაწილი.

გამოძიება ქრთამის აღების ფაქტზე მიმდინარეობს (საქართველოს სსკ-ის 338-ე მუხლის 1-ლი ნაწილით, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით).