საკონსტიტუციო სასამართლოს თავმჯდომარემ გიორგი პაპუაშვილმა მთავარ პროკურორთან ირაკლი შოთაძესთან პირისპირ შეხვედრის შემდეგ განაცხადა რომ მათი საუბარი ნაყოფიერი იყო და საბოლოოდ თანამშრომლობაზე შეთანხმდნენ:

"ვფიქრობ რომ ღიად ვილაპარაკეთ იმ საკითხებთან დაკავშირებით, რაზეც დაწყებულია გამოძიება, თუ რატომ იყო ჩვენი ეჭვი და კითხვის ნიშნები გამოძიების ობიექტურობასთან. ისეთი შთაბეჭდილება დამრჩა რომ მისი მიდგომა თანამშრომლობაა".

პაპუაშვილის განმარტებით, პროკურორმა პასუხისმგებლობა საკუთარ თავზე აიღო რომ გამოძიება ობიექტურად წარიმართება:

"თუკი რომელიმე მოსამართლემ გარკვეული ინფორმაცია მიაწოდა გამოძიებას, საშიშროება არ იქნება, რომ მისი რომელიმე ოჯახის წევრზე ან ახლობელზე შური იძიონ. ასევე, წამოვაყენე ის პრეტენზიები, რაც ჩვენ გვქონდა, როცა ჯერ კიდევ წელიწადნახევრის წინ, ზეწოლის ფაქტებზე იყო საუბარი. მაშინ ვახტანგ გომელაურისთვის, მთავარი პროკურორის გიორგი ბადაშვილსთვის და ასევე აჭარის პროკურატურისთვის მიწერილ წერილებზე არავითარი რეაგირება არ ყოფილა. ამაზე მან მიპასუხა რომ თავად გაერკვეოდა, რადგან აღნიშნულ საკითხებს არ იცნობდა".

პაპუაშვილის თქმით, მისი და მთავარი პროკურორის შეხვედრა არ ყოფილა გამოკითხვის რეჟიმში, არამედ მათ ინფორმაცია გაცვალეს და განიხილეს სხვადასხვა საკითხები, მათ შორის, მოსამართლის ოჯახის წევრსა და მის კერძო ბიზნესთან დაკავშირებით:

"შევხედავთ ეს გამოძიება როგორ წარიმართება".