ნენე დალაქიშვილი, რომელმაც გუშინ, 28 ივნისს უცხოელებზე ძალადობის შესახებ პოლიციას აცნობა, ამბობს, რომ ემუქრებიან. შინაგან საქმეთა სამინისტროში აცხადებენ, რომ საქმის გამოძიება დაიწყეს.

როგორც უწყების პრესსამსახურმა On.ge-ს უთხრა, გამოძიება სისხლის სამართლის კოდექსის 151-ე მუხლით მიმდინარეობს. ამ მუხლით, სისხლისსამართლებრივი პასუხისმგებლობა მუქარისთვის დგება.

დალაქიშვილის თქმით, მუქარის წერილების მიღება მას შემდეგ დაიწყო, რაც პოლიციას უცხო ქვეყნის ორი მოქალაქის ცემის შესახებ შეატყობინა.

საუდის არაბეთისა და აშშ-ის მოქალაქეები თბილისში, გუშინ გვიან ღამით სცემეს. საუდის არაბეთის მოქალაქის თქმით, სახლში ბრუნდებოდნენ, როდესაც ქართულად მოქალაქე 5-6 პირი დაინახეს. მისივე განმარტებით, იმ პირებიდან ერთ-ერთმა მას თვალში ქვა ესროლა.