მას შემდეგ, რაც საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ სასამართლოს მოსამართლეებზე ზეწოლა ხორციელდება, დღეს პროკურატურაში დაკითხვაზე ერთ-ერთი მათგანი, ქეთევან ერემაძე მივიდა, რომელმაც საგამოძიებო უწყების შენობაში შესვლამდე განმარტა, რომ ერთ-ერთ მოსამართლეზე ზეწოლის კონკრეტული ფაქტების შესახებ აქვს ინფორმაცია:

"მე პროკურატურას იმ ინფორმაციას მივაწვდი, რა ფარგლებშიც მე მას ობიექტურად ვფლობ. ამავდროულად, არ შემიძლია არ ვთქვა, რომ თუკი მოსამართლეებთან ასეთი არაჯანსაღი კომუნიკაცია აღწევს სიმწვავის იმ ხარისხს, როდესაც მოსამართლეს უწევს იმაზე დაფიქრება, რომ შეძლებს თუ არა ის, ამ ფაქტობრივ გარემოებებში, მიიღოს ობიექტური გადაწყვეტილება, ჩემი აზრით, თუმცა ამას რჩევის სახითაც ვერ მივცემ ვერავის, რომ ეს ინფორმაცია უნდა მიეწოდოს გამოძიებას".

ამასთან, ცნობილია, რომ საგამოძიებო უწყებაში 4 საათზე საკონსტიტუციო სასამართლოს კიდევ ერთი მოსამართლე, მერაბ ტურავა მივა დაკითხვაზე.

21 ივლისს საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ რომ სასამართლოს მოსამართლეებზე და მათ ახლობლებზე ზეწოლა, თვალთვალი და მუქარა მიმდინარეობს.