ქართული ოცნების დეპუტატის, ანრი ოხანაშვილის განცხადებით, ხორავას ქუჩის საქმეზე შექმნილ საგამოძიებო კომისიაში უნდა იყოს დაცული უდანაშაულობის პრეზუმცია და პარტია ევროპულმა საქართველომ წინასწარი განწყობები არ უნდა შექმნას.

ანრი ოხანაშვილის განცხადებით, საზოგადოება განსჯის რამდენად სწორია პროკურორის შეურაცხმყოფელი სიტყვებით მოხსენიება.

"ვიცოდით, რომ ეს რისკები საგამოძიებო კომისიას უკავშირდებოდა. ჩვენ ვიმედოვნებთ, რომ გამოიჩებთ პოლიტიკურ ნეიტრალიტეტს და ანალიზზე დაფუძნებით წარმართავთ მუშაობას", - მიმართა ანრი ოხანაშვილმა პარლამენტის პლენარულ სხდომაზე ევროპული საქართველოს დეპუტატებს.

ანრი ოხანაშვილის აზრით, საგამოძიებო კომისიის დეპუტატების შეფასებითი განცხადებები კითხვის ნიშნის ქვეშ აყენებს კომისიის ნეიტრალურობის საკითხს.

"თუ შევქმნით განწყობებს და გავაკეთებთ წინასწარ შეფასებებს, როცა დასაკითხია ათობით მოწმე და ჩვენ წინასწარ განწყობებს ვქმნით და ვაფასებთ ამ ფორმით საკითხებს, ეს არის სახიფათო რამ და არ იქნება სასიკეთო საგამოძიებო კომისიისთვის, ამან არ უნდა შექმნას კომისიის დისკრედიტაციის საფრთხე", - განაცხადა ანრი ოხანაშვილმა

დეპუტატის განცხადებით, კომისიის მუშაობის პრინციპი უნდა იყოს უდანაშაულობის პრეზუმციის განუხრელად დაცვა და გამოძიების წარმართვა, არა წინასწარი შეფასებით და წინასწარი მოლოდინების შექმნით, არამედ საქმის მასალების სრულად გაცნობით და შემდგომ ანალიზზე დაფუძნებული დასკვის გამოტანით.

ანრი ოხანაშვილის თქმით, ევროპულ საქართველოს აქვს შანსი იყოს პოლიტიკურად ნეიტრალური.

"ეს არ გამორიცხავს პოლიტიკურ შეფასებებს, თუმცა წინასწარი სურათის შექმნა და ასეთი განცხადებების გაკეთება თქვენს ნეიტრალობას კითხვის ნიშნის ქვეშ აყენებს და არც ჩვენთვის არის მისაღები კომისიის მიმართ კითხვები გაჩნდეს", - განაცხადა ანრი ოხანაშვილმა.

პარლამენტში ხორავას ქუჩის საქმეზე შექმნილმა საგამოძიებო კომისიამ უკვე მოუსმინა საქმის პროკურორსა და გამომძიებელბს, იგეგმება საქმესთან დაკავშირებული სხვა პირების დაბარებაც.

ხორავას ქუჩის საქმეზე შექმნილმა საგამოძიებო კომისიამ პარლამენტში პირველი სხდომა 8 ივნისს გამართა.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.