ერთიანი ნაციონალური მოძრაობის საგარეჯოს მაჟორიტარი დეპუტატობის კანდიდატის ზურაბ ჭიაბერაშვილის განცხადებით, სოფლის მეურნეობის სამინისტრომ მევენახეებისთვის განკუთვნილი 14 მილიონი ლარი გაფლანგა.

ენმ აცხადებს, რომ საგარეჯოს რაიონის სოფელ მანავში მომხდარი სტიქიის კვალზე, სოფლის მეურნეობის პროექტების მართვის სააგენტომ ფული გაათეთრა და მნიშვნელოვანი საბიუჯეტო სახსრები მიისაკუთრა.

ჭიაბერაშვილის თქმით, სახელმწიფო სახსრების მითვისების მიზნით, სოფლად მცხოვრები სტიქიის დროს დაზარალებული მოსახლეობა სოფლის მეურნეობის სამინისტროს თანამშრომლებმა იარაღად გამოიყენეს და სახელმწიფო ბიუჯეტის სახსრები მიითვისეს.

"ამ დრომდე გაურკვეველია დანაშაულებრივად შემუშავებული სქემით დაზარალებული საგარეჯოს რაიონის მოსახლეობის ბედი და მათ ამ დრომდე არ ანაზღაურებიათ სადაზღვევო შემთხვევით დამდგარი ზიანი" - აცხადებს ენმ.

ენმ მთავარი პროკურორისგან, ფინანსთა სამინისტროს საგამოძიებო სამსახურის უფროსისგან და სახელმწიფო აუდიტის სამსახურის გენერალური აუდიტისგან მოითხოვს, რომ გასაჯაროვდეს ინფორმაცია იმ გამოძიების შესახებ, რომელიც კოალიცია საზოგადოებრივი ინიციატივის სარჩელის საფუძველზე მიმდინარეობს.

ერთიანი ნაციონალური მოძრაობა აღნიშნულ ორგანოებს მოუწოდებს შეისწავლონ აგროდაზღვევის პროგრამის განხორციელების კანონიერების საკითხი, გამოავლინონ დანაშაულებრივი ჯგუფის ბრალეული პირები, მისცენ ისინი სისხლისსამართლებრივ პასუხისგებაში და დაეხმარონ სტიქიით დაზარალებულ მოსახლეობას სადაზღვევო თანხების მიღებაში.