პარლამენტის საგამოძიებო კომიტეტის სხდომაზე ხორავას საქმის ერთ-ერთმა პროკურორმა, ზვიად ფხაკაძემ განაცხადა, რომ ფარდული, რომელშიც არასრულწლოვნები დაჭრეს და მოგვიანებით დაანგრიეს ვერ დაილუქებოდა.

კომისიის წევრის, ოთო კახიძის კითხვაზე - რატომ არ დაილუქა დანაშაულის ადგილი - პროკურორი პასუხობს, რომ გამოძიებისთვის მნიშვნელოვანი ყველა მასალა ფარდულიდან აიღეს და დალუქვის აუცილებლობა არ იყო:

"მაგ ლოგიკით თუ გავყვებით, მაშინ უნდა დალუქულიყო მთლიანად შემთხვევის ადგილი. თუ თქვენ ფიქრობთ, რომ ფარდული უნდა დაგვეხურა, რომ სისხლის კვლები აგვეღო, რომ არ განადგურებულიყო, მინდა გითხრათ, რომ იქედან თავდაპირველად ამოღებული იყო ყველანაირი სისხლის კვალი, რაც მნიშვნელოვანი იყო გამოძიებისთვის."

ფხაკაძის თქმით, გაეცნო ფარდულის დათვალიერების ოქმს და ჩათვალა, რომ კვალი ყველა საჭირო ადგილიდან იყო აღებული. მისივე თქმით, ფარდული ისეთ ტერიტორიაზეა, რომლის სრულად დალუქვა ფიზიკურად შეუძლებელი იყო.

ეს კითხვა ფხაკაძის მიმართ მას შემდეგ გაჩნდა, რაც ხორავას საქმის გამომძიებელმა, კახაბერ სირაძემ კომისიის წევრებს უთხრა, რომ ფარდული გამოძიებისგან დამოუკიდებლად განადგურდა. სირაძის განცხადებით, გადაწყვეტილება დანგრევის შესახებ ადგილობრივებმა მიიღეს და პოლიცია საქმის კურსში არ ჩაუყენებიათ.