ეროვნულ-დემოკრატიული ინსტიტუტის უახლესი კვლევის თანახმად, 2016 წლის ივნისის მდგომარეობით, გამოკითხულთა მხოლოდ 64 პროცენტს მიაჩნია, რომ ევროკავშირთან უვიზო მიმოსვლა სარგებელს მოტანს მათთნაირ ხალხს. მიმდინარე წლის მარტში ამ მოსაზრების სჯეროდა 72 პროცენტს.

გამოკითხულთა 26 პროცენტი მიიჩნევს, რომ ევროკავშირთან უვიზო მიმოსვლა სარგებელს არ მოუტანს, ეს მაჩვენებელი რამდენიმე თვის წინ 18 პროცენტი იყო. 10 პროცენტმა კი არ იცის, ეს საერთოდ იქნება თუ არა სარგებლის მომტანი.

NDI-ის კვლევის მიხედვით, ევროკავშირთან უვიზო მიმოსვლას სარგებლის მომტანად მიიჩნევს 18-დან 35 წლამდე მოქალაქეების 71 პროცენტი, იგივე მოსაზრებაზეა 56 წელზე მეტი ასაკის ადამიანთა 51 პროცენტი და 36-55 წლის ასაკის ადამიანთა 67 პროცენტი. შესაბამისად, ახალგაზრდები უფრო მეტად ფიქრობენ, რომ ევროკავშირთან უვიზო მიმოსვლა სასარგებლო იქნება.

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.