საქართველოში თურქეთის ელჩმა, ზექი ლევენთ გუმრუქჩუმ დღეს, თბილისში პრესკონფერენცია გამართა. ელჩმა თურქეთში მიმდინარე მოვლენებზე და საქართველოსთან ურთიერთობებზე ისაუბრა.

ელჩმა ყურადღება გაამახვილა პრესაში გავრცელებულ ინფორმაციასა და სადავო საკითხებზე.მან აღნიშნა, რომ თურქეთში მიმდინარე ე.წ წმენდა ქვეყნის კონსტიტუციასა და სამართლებრივ აქტებს შეესაბამება და ეს არის აუცილებელი ზომა:

"რაც შეეხება დაკავებულთა რიცხვის ზრდას, პრობლემა, რომლის წინაშეც მათ დაგვაყენეს გაცილებით უფრო მძიმე იყო, ეს რიცხვი არაფერია. ჩვენ ვსაუბრობთ სამხედრო გადატრიალებაზე, რომელიც მიზნად ისახავდა დემოკრატიული გზით არჩეული ხელისუფლების ჩამოგდებას"

რაც შეეხება დაკავებულთა რიცხვის ზრდას, პრობლემა, რომლის წინაშეც მათ დაგვაყენეს გაცილებით უფრო მძიმე იყო, ეს რიცხვი არაფერია

თურქეთის ელჩი საქართველოში

ელჩმა აღნიშნა, რომ ქართულ პრესაში გავრცელებული ინფორმაცია დაკავებულების წამების შესახებ, სიმართლეს არ შეესაბამება. მისი თქმით, თურქეთის იუსტიციის სამინისტრომ გაავრცელა განცხადება ამასთან დაკავშირებით, რომელსაც თარგმნიან და გადასცემენ ქართულ მხარეს. ელჩმა აღნიშნა, რომ თურქეთის ციხეებში საერთაშორისო ორგანიზაციების წარმომადგენლები ხშირად ატარებდნენ მონიტორინგს და ეს პროცესი არც ახლა შეწყვეტილა, დაკავებულებს კანონის შესაბამისად ექცევიან და წამების, ან უფლებების შელახვის ფაქტი არ დაფიქსირებულა.

ელჩი პრესაში გავრცელებულ კიდევ ერთ საკითხს შეეხო. მან სიკვდილის დასჯის აღდგენის მოთხოვნაზე ისაუბრა:

"ქართულ პრესაში ხშირად ვხედავთ შეშფოთებას სიკვდილის დასჯის შემოღებასთან დაკავშირებით. უპირველეს ყოვლისა უნდა აღვნიშნო, რომ ეს საკითხი განიხილება მხოლოდ საზოგადოებაში, ამ საკითხის პარლამენტში ინიცირების მიზნით არ გადადგმულა არცერთი ნაბიჯი. თურქეთი მოწინავე ქვეყანაა სამართლებრივი პრინციპების თვალსაზრისით. ასე რომ, რა შედეგიც არ უნდა მოყვეს ამ კამათს, წარმოუდგენელია თურქეთი მოწყდეს ევროპულ ფასეულობებს. მაგალითისთვის მოვიყვან ამერიკას, იქ მიღებულია სიკვდილით დასჯა, თუმცა არავინ დავობს ამერიკის დემოკრატიულობაზე"

ელჩმა აღნიშნა, რომ ამ ფაქტებიდან გამომდინარე ხშირად საუბრობენ თურქეთის საგარეო პოლიტიკური კურსის ცვლილებაზე, რაც არასწორია:

"თურქეთ-ევროპის ურთიერთობები ემყარება მტკიცე ფასეულობებს და ჩვენ ამ გზას არ გადავუხვევთ. მინდა ხაზგასმით აღვნიშნო, რომ მოსაზრებები თითქოს თურქეთი გამოვა ან გაუშვებენ ნატოდან და ის შეკრავს ალიანს რუსეთთან, არის აბსოლუტურად მცდარი".

15 ივლისს სამხედრო გადატრიალების მცდელობის შემდეგ, თურქეთში ათასობით ადამიანი დააპატიმრეს და სამსახურიდან გაათავისუფლეს. საერთაშორისო ორგანიზაცია Amnesty International-მა კი დაკავებულთა წამებისა და არაადამიანური მოპყრობის შესახებ გაავრცელა ინფორმაცია.