NDI-მ საზოგადოებრივი აზრის კვლევის შედეგები წარადგინა, რომლიდანაც ირკვევა, რომ გამოკითხული მოსახლეობის 54 პროცენტი მიიჩნევს, რომ საქართველო მეტ სარგებელს მიიღებს ევროპული და ევროატლანტიკური ინტეგრაციით, 29 პროცენტი მიიჩნევს, რომ ჩვენი ქვეყანა მეტ სარგებელს იმ შემთხვევაში მიიღებს თუ რუსეთთან ურთიერთობის სანაცვლოდ უარს იტყვის ევროპულ ინტეგრაციაზე, 8 პროცენტი არცერთ მოსაზრებას ეთანხმება, ხოლო 10 პროცენტი ამ საკითხთან დაკავშირებით ჩამოყალიბებული არ არის.

კვლევის შედეგების თანახმად, თბილისის მოსახლეობის 67 პროცენტს სურს ევროპული ინტეგრაცია, 19 პროცენტს უნდა რუსეთთან უკეთესი ურთიერთობის სანაცვლოდ ევროინტეგრაციაზე უარის თქმა, 7 პროცენტი არცერთ მოსაზრებას ეთანხმება, 6-მა პროცენტმა პასუხი არ იცის.

გარდა ამისა, ქალაქში მცხოვრები მოსახლეობის 55 პროცენტი მიიჩნევს, რომ საქართველო მეტი სარგებელს მიიღებს ევროინტეგრაციით, 26 მიიჩნევს, რომ იმავე მიზანს ქვეყანა რუსეთთან უკეთესი ურთიერთობის სანაცვლოდ ევროპულ ინტეგრაციას უარის თქმით მიაღწევს, 8 პროცენტი არცერთ მოსაზრებას ეთანხმება, 12-მა პროცენტმა კი არ იცის, რა აჯობებს.

კვლევის შედეგების თანახმად, სოფელში მცხოვრები მოსახლეობის 47 პროცენტი ამბობს, რომ უმჯობესია საქართველოს ევროინტეგრაცია, 35 პროცენტს მიაჩნია, რომ რუსეთთან უკეთესი ურთიერთობის სანაცვლოდ ევროპულ ინტეგრაციაზე უარი უნდა ვთქვათ, 9 პროცენტი არცერთ მოსაზრებას იზიარებს, ასევე 9 პროცენტს არ აქვს პასუხი.

ამასთან, უმცირესობათა დასახლებებში მცხოვრები მოსახლეობის 29 პროცენტს მიაჩნია, რომ საქართველო მეტ სარგებელს ევროპული ინტეგრაციით მიიღებს, 47 პროცენტს ჰგონია, რომ უმჯობესი იქნება რუსეთთან ურთიერთობის ნორმალიზების მიზნით ევროინტეგრაციაზე უარის თქმა, 6 პროცენტი არცერთ მოსაზრებას ეთანხმება, 16 პროცენტს კი პასუხი არ აქვს.

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.